周美欣730日零收入

出入巴士前路茫茫

最窮的日子是兩年零收入，幸而家人在背後支持，自覺好幸福。

「呢兩個月開始做多咗modeling嘢，入息多過做歌手，做歌手好難搵錢。以前細個唔會諗錢銀問題，因為有屋企人養，但養咗我咁多年，連自己都開始有啲驚，想搵多啲錢，唔敢話要養家，況且都唔知養唔養得起？但可以支持自己，唔使繼續要屋企人養我。我啲屋企人全部喺溫哥華，得我喺香港，屋企人租咗個地方畀我住，所以住唔使錢，其實如果我唔喺香港，都唔使專登租地方畀我啦。」周美欣說。

她續說：「曾經有兩年係完全零收入，嗰兩年點過？自己一個人唔使出街嘅話，一百蚊就夠，如果出街食飯，就要二、三百蚊，平時搭港鐵、巴士，間中先會搭的士，過海一定唔會搭的士，媽咪教我搭隧道巴，慳好多。好彩屋企人好錫我，我同媽咪有個聯名戶口，佢見戶口冇錢，就會自動入錢落去，我覺得自己好幸福，有家人錫，但就好灰，覺得茫茫前路……嗰時冇嘢做，就不停去學嘢，但學乜都要錢，咪又係要屋企人畀！覺得自己好冇用。最記得兩年後第一個商場騷，做完收到四千蚊，好開心終於有嘢做喇！即刻入晒啲錢落個聯名戶口度。」

周美欣	周美欣（右）參加2007年港姐奪季軍，張嘉兒（中）摘冠，王君馨是亞軍。	李玟頒獎給參加全球華人新秀大賽的周美欣（右）。

從不放棄 唱作之路

歌手搵錢不容易，但她未想過放棄，繼續未完的歌手夢。

周美欣繼續說：「父母喺加拿大開麵廠，做生麵，我一嚟香港，佢哋就問我打算玩幾多年？想我返加拿大，所以我要快啲搵嘢做囉，哈哈……我同家人好close，佢哋成日話好掛住我，周不時飛嚟探我，佢哋想我返加拿大，但係我唔會放棄唱歌，之前自學彈結他，有試吓作曲，但仲未作到合乎條件，畀過朋友聽，佢哋好鍾意，都未完成o架！」

如此堅持，想做創作歌手？她答道：「多數歌手都會自己作吓曲詞，有少少代表自己嘅作品畀人聽到，起碼係好啲，好多外國歌手都係咁，依家間中都有唱歌騷，早幾個月做咗個慈善演唱會，啲人問我最鍾意做乜？始終都係唱歌啦，不過香港artist永遠乜都要做，有嘢拍梗係拍，我覺得拍戲可以幫到唱歌，唱歌亦會幫到拍戲，係冇衝突嘅。」

周美欣的泳裝，盡騷美好身材及長腿。

周美欣已捱過最窮困的日子，希望否極泰來。

學以致用 冧到客

正如周美欣所言「香港藝人乜都要做」，故一向好學的她，報讀了不同的課程，藉此豐富人生。早前她完成珠寶鑑證課程，她說：「自從修讀咗珠寶鑑證後，發覺對工作有啲幫助，有次我做珠寶騷模特兒，喺客人面前示範珠寶，客人對我示範嘅珠寶好有興趣，我就搭吓嘴，講解一吓，佢哋竟然好欣賞，因為其他同場嘅外籍模特兒係唔會講嘢嘅。」

P:rofile

姓名：周美欣

英文名：Lorretta

國籍：加拿大

出生日期：1988年7月10日

教育程度：英屬哥倫比亞大學

入行經過：2005年奪得新秀歌唱大賽溫哥華選拔賽冠軍，2007年參加香港小姐，獲得季軍而正式入行，2010年離開無綫轉做歌手，2013年推出首張個人EP，現時除了唱歌，還不時行珠寶騷及時裝騷，開始在社交界冒起。

文：Tracy Leung

攝影：劉智源

服裝：Dorian Ho