杏兒開財路 收錢療Dry

胡杏兒、王祖藍及阮兆祥昨晚齊為李思捷主持的節目《今晚睇李》任嘉賓，曾與思捷傳緋聞的杏兒，以一襲黑色Deep V造型成為焦點，更稱專程來賀「好兄弟」任今季最後一集主持，還直言不擔心男友Philip因此呷醋。

談到以她為首的「胡說八道會」姻緣旺盛，問到會否加入Dry爆成員旺一旺？杏兒哈哈笑謂：「咁我就要收會費，不過都歡迎新成員，李施嬅（前名：李詩韻）都啱啱加入，總之啱傾就得，唔一定要姓胡嘅。（加男仔成員？）咁會怪怪地喎，但都會考慮嘅。」對於昔日合作過的監製梅小青及劉家豪有意羅致她拍攝香港電視娛樂（港娛）的劇集，杏兒感謝對方賞識，不過對方尚未接觸她，更謂：「同無綫仲有合約。（幾時完？）商業秘密，（其他公司向你招手？）到時有嘢就會宣布，（將來同小青姐合作？）將來嘅嘢冇人知，現階段未諗，希望佢同家豪哥可以拍好多好劇。」

李思捷與杏兒曾傳緋聞。

杏兒與現任男友Philip感情穩定。

祖藍處男拍內地劇

而與思捷同樣口才了得的祖藍，笑指錄影時會（目及）實思捷：「睇佢有冇放過現場啲女，因為成日用公司資源捧新面孔，（驚畀佢玩？）我哋玩佢，會專登跳錯啲舞、唱錯啲歌添！」祖藍又透露稍後將到內地「處男下海」拍古裝劇，自嘲家庭負擔重，故會把酬勞當作家用。談到監製梅小青及劉家豪有意找《溏心風暴》班底拍新劇，曾參演該劇的祥仔表示二人均是其恩師，當中後者更有知遇之恩：「因為佢套劇先拎到『最佳男配角』。（同無綫未約滿點拍？）喺合約許可情況下，我好恨拍佢哋啲劇，佢兩個每次都用足200分力去拍，係好認真嘅監製。」

祥仔（左）與祖藍重拾「福祿壽」美好時光，杏兒就左右逢源。

胡定欣（右）與林夏薇昨為新劇開工。

胡定欣睇緣分合作

此外，杏兒老友胡定欣昨日為劇集《公公出宮》開工，對於劉家豪及梅小青即將於港娛開劇，問到她可有興趣？定欣謂：「我份合約仲有一段時間，每個演員喺出面嘅工作細則都唔同，最緊要係份工作啱唔啱做，有緣分去做嘅話，乜可能性都有。」

文：影視組