Cara G.諗定避孕 鎖老公出廳

昨日懷有六個月身孕的名模Cara G.與Ana R.一同出席活動，腹大便便的Cara還抱着女兒India現身，問到現在抱女會否困難？她說：「其實我依家仲成日抱佢，有時佢仲坐喺我個肚上不停『UN』，我諗遲啲個肚再大啲都唔可以，依家同老公輪流湊佢，（幾時停工？）唔會停，除非健康有問題，依家個胎22周，明日會去照仔定女。」

唔再諗生10個

記者笑問她可有給生B貼士予恨當媽媽的Ana？Cara即笑說：「好難講，我太容易有BB，可能同老公就咁望住都會有，呢兩胎都唔係計劃之中，我諗生完之後要同佢分房瞓，鎖佢出廳先得。」她又認為香港養小朋友太貴了，雖然曾經想過要生十個小朋友，但現在想法有變要減少。

此外，剛與丈夫結婚兩周年的她被問到可有慶祝？她謂因工人未到埗，故沒有時間：「出去食飯又冇BB座位，之前我生日唔舒服都冇慶祝。自從生完BB後，都冇試過同老公單獨相處，遲啲工人嚟咗，我哋諗住去君悅住番一晚，不過可能到時又會掛住個女叫工人帶嚟。」她又表示將會與Jesper及囡囡到泰國工作及遊玩，會是生育前最後一次外遊，而復活節她就會留港，帶囡囡到沙灘玩耍，笑言害羞不敢穿三點式。

Ana不急於造人，只計劃生一個。

已有六個月身孕的Cara，流露幸福笑容。

Ana順其自然

而同場的Ana被問到可有向Cara取生B經？她說：「要發生就會發生，除非我已經有BB，就會問佢攞貼士，否則都冇乜嘢好問。（依家努力造人？）順其自然啦，唔急得。（想生幾多個？）我好鍾意小朋友，我細佬有五個仔女，但我覺得香港養小朋友太貴，所以我諗只係生一個。」

文：名人組