鎮宇寸爆華哥：去歐洲大晒咩！
新片《衝鋒車》前晚首映，男主角之一的任達華與古巨基雙雙缺席，同片的吳鎮宇即取笑身在意大利拍戲的華哥：「去歐洲大晒咩，睇吓冇佢宣傳，套戲會唔會好啲。」華哥得悉後笑稱鎮宇有宣傳手腕，望藉此博版面助新片大賣！
吳鎮宇、鄭浩南、譚耀文、姜皓文、衛詩雅和陳家樂，與導演劉浩良及監製鄭保瑞等，前晚於九龍灣出席英皇新片《衝鋒車》慈善首映，男主角古巨基與任達華同因身在外地工作而缺席。
衛詩雅自爆拍拖
得悉拍檔華哥缺席，鎮宇他戲言：「去歐洲大晒咩，去遊埠之嘛！睇吓冇佢宣傳，套戲會唔會好啲，不過咁講好似好hurt。」鎮宇又與阿譚笑指華哥是口水佬，拍攝期間無所不談，阿譚說：「華哥無所不談，分享買樓經，又講佢以前點拍戲，仲話請我哋去佢英國餐廳食嘢。（你咪冇得休息瞓陣？）我唔瞓得，一瞓就水腫。」衛詩雅則透露已有圈外對象：「佢係普通人，做文職，唔係富二代，我哋去街都係食茶餐廳。」
正於意大利拍電影的華哥，得知自己遭鎮宇揶揄，即讚拍檔把握機會宣傳：「鎮宇咁講可以幫套戲博多啲新聞篇幅，如果套戲大賣最好，下次我哋兩家人去歐遊，公司出錢！」
盼趕及內地宣傳
華哥續說：「意大利天氣好，藍天白雲，我影咗張相畀鎮宇，希望佢思想充滿藍天，不帶烏雲，心花怒放。」華哥指電影將於日內完成拍攝，希望能趕及回港與拍檔們到內地宣傳，而基仔今天會於北京會合大隊繼續宣傳。
文：影視組