Cara G.日理萬機恨有48小時
熱愛潮流的名模Cara G.笑言自己每天有不同的style，亦在不斷尋找專屬形象，並發表甚麼才是潮流的真諦！極具生意頭腦的她已於數年前在果汁界喝了頭啖湯，她表示還有很多生意諗頭，雖然繁忙的工作及家庭生活已完全佔據了自己的每分每秒，可是即將再次榮升媽媽的她卻開心地冀望每天可有48小時，好讓她在各方面都能兼顧得更好！
憑招牌甜美笑容在模特兒界闖出名堂的混血女模Cara G.，自言從小便鍾愛時裝，但絕不會盲目追隨潮流，揚言必須找到和擁有自己的專屬形象才算是「真正的潮流」，她謙虛地說：「其實我冇真正好深入研究或者係讀過有關潮流、時裝嘅知識，但我做咗12年模特兒，活學教育反而令自己更容易了解時裝潮流，我好鍾意fashion係因為佢係我生活及工作嘅一部分，同埋女性都係愛扮靚！」
她自嘲以往對打扮一竅不通，觸覺並不是與生俱來的：「好多人年輕時都會嘗試去搵屬於同適合自己嘅形象，當我仲係青少年嘅時候，都對自己嘅形象覺得好混淆，當時係咩造型都想試，但我依家好享受找尋屬於自己嘅獨有形象，好鍾意依家呢個咁舒服嘅style，（你嘅獨有形象係？）好難去定斷或者分類，因為我嘅形象每日都跟住自己嘅心情或時間而改變，不過我大致上喜歡簡單啲、唔太高貴、太女仔或男性化打扮。」
有興趣設計童裝
Cara並細說自己鍾愛的季節和服裝配搭：「我好鍾意春夏呢兩個季節，配上長裙就最恰當，或者加件jacket就夠晒活力，而冬天就一定要有cardigan（開襟羊毛衫）、冷帽同頸巾，而黑色同牛仔色嘅衣物係我全年通用嘅顏色，我唔鍾意擺咁多顏色上身，黑色同白色係我最愛嘅，我好鍾意對比色！」
畫功了得的她透露一直有意成為時裝設計師，並一早已開始嘗試設計婚宴晚裝，還為自己設計出席活動的服裝，更很有興趣設計童裝，預告將來或許會成立自家服裝品牌！同時，她又謂現正準備建立個人部落格，屆時可大派fashion貼士：「呢個係一個lifestyle blog，入面有一part係講潮流服裝，分享一啲styling tips，例如mix & match，4月就會開始運作。」
生完修身再衝刺
雖然如此，但已開設果汁店數年的Cara表示從來未曾想過經營有關時裝、模特兒的生意範疇，全因遵從個人多年來的健康生活理念和發掘到果汁市場的發展潛力，她闡述說：「因為我意識到人嘅健康會不停轉變，所以維持健康飲食係好重要，我對呢方面好有興趣，第一次發展自己嘅事業，首要係你要對嗰樣嘢極有興趣先會有動力做同可以做得好，我好想分享呢個重要資訊畀大家，加上當時我睇到香港嘅果汁市場仲未有人開始做，一定會對呢樣物品產生好大需求，係一個完美嘅發展機會同潛力。（生意上有何新計劃？）其實依家果汁店經營得好好，之後我想搞嬰兒用品品牌或者其他新嘅生意多啲，有好多idea未決定，只不過依家有咗第二個BB，暫時未有時間去實行，到我生完同瘦身完畢後就會繼續向前衝！」
分配時間有難度
談到身兼模特兒、果汁店老闆及潮媽數職，如何分配時間？分身不暇的Cara承認的確有難度，幸好現在已適應繁忙的生活步伐：「一開始做呢門生意時，乜都唔識，但又乜都係一腳踢，後來舖頭搬去中環又有好多嘢要搞，仲要照顧India（囡囡），所以當時畀好大壓力自己，不過依家情況好好多啦，生意上晒軌道，India又開始大個唔使再餵人奶，忙完一日都唔再覺得係壓力爆煲，只可以話係筋疲力盡，因為做完嘢返到屋企都冇機會攤喺梳化度抖吓食吓嘢，就即刻要照顧India同陪佢玩！而依家有埋第二個BB，之後實會再忙啲。」她其後表示常幻想每天可擁有48小時，讓她可好好分配時間，達致平衡點！
搖搖擺擺好牙煙
日前Cara拍攝Marella時裝專輯時，身為專業模特兒的Cara盡顯其敬業精神，她無懼腳踏高跟鞋而不斷搖擺裙襬，只希望達到最佳的拍攝效果！連身旁的工作人員都大呼「牙煙」，急忙勸阻她。
囡囡是好姐姐
去年三月誕下可愛囡囡India的Cara，早前再度公布喜訊，將於七月為丈夫Jesper再添一名家庭成員！而現在「肚凸凸」的她表示India已知自己將會添加「姐姐」的身份：「India好似好明白咩係有咗BB咁，佢對我個肚好感興趣，我知道佢都好鍾意小朋友，因為平時帶佢去公園玩，佢見到其他小朋友會開心到尖叫，好鍾意同佢哋玩，我相信佢會係一個好好嘅家姐。」
採訪：車車
攝影：攝影組
服裝：Marella