周秀娜再搏10年 轉型做索媽

20出頭 40成家

女神周秀娜（Chrissie）20歲出頭加入娛樂圈，憑32D驕人身材成功突圍，成為一代宅男女神，掀起「周秀娜現象」。不過Chrissie卻說自己當年「唔知自己想要咩」：「20歲時未諗得咁深入，仲諗緊自己想做咩，仲追尋緊自己鍾意做咩，人生目標係咩，仲試緊，我諗到22、23歲搵到之後，先真正知道自己。由22到29歲期間一步一步做到自己想做嘅嘢，都滿意。」

30歲，對不少女士都是一個重要關口，有人會擔心事業順利卻成為「剩女」，今年即將踏入30歲的Chrissie坦言未驚過：「我冇特別去諗年紀，踏入另一個年紀有另一種心態，我覺得每一個階段都有佢值得紀念嘅地方同靚嘅地方，依家仲未好感受到，可能真正去到30歲時，可以睇吓用咩方法去紀念。」

沒有催婚壓力的周秀娜，可以先專心工作。	周秀娜有很強的事業心，演藝事業與推廣品牌可雙線發展。	周秀娜

35歲前事業為重

至於想到未來十年的願景，Chrissie希望可以組織家庭：「10年之後唔知我結婚未呢？好似好多嘢都試過，40歲都好想生兒育女，組織一個家庭，但35歲前都係會將事業行先。」如果十年之後生兒育女，周秀娜仍然會是當年性感周秀娜？她說：「唔知呀，有仔女好似距離自己好遠，所以未諗，不過我覺得我唔會放棄自己鍾意嘅嘢，40歲嘅時候如果我做到媽咪，我都想自己係一個靚媽咪，希望小朋友都覺得媽咪好正、好性感，個個女仔都希望每個階段都有唔同美態。」

周秀娜自己做生招牌，推廣自己的內衣品牌。	周秀娜	周秀娜於2013年與內衣生意合夥人董路傳出緋聞。

主意多多 擴展版圖

Chrissie向來主意多多，由以前做「o靚模」出寫真，已經懂得大搞噱頭送攬枕，到去年更創立個人內衣品牌，一圓老闆夢，滿有信心的她直言睇好品牌前景：「品牌都係剛剛開始，暫時未知將來發展如何，不過由自己構思，到搵到一班有經驗又有心機去做嘅人，籌備、設計到正式成立品牌，之後搵到合作嘅網購平台，依家網上有得賣，我覺得係一個好好嘅開始，至於牌子跟住發展我好難預計，但我相信係好嘅。」雄心壯志的Chrissie希望半年內可以回本，更期望今年中可以開設第一間香港旗艦店。

談起品牌頭頭是道的Chrissie多番自認生意新手，不過有今時今日的成績，除了是幸運，更因為身邊有許多人幫助，而家人正是不可多得的支持：「我諗媽咪可以用身體去支持，因為佢可以着我嘅產品，屋企人一向都好支持我，加上爹哋以前又好熟悉做生意，佢畀到好多意見我，但其實我見到佢哋開心，本身就已經係一個最大支持。」

演藝事業大生意

有粉絲擔心Chrissie會否因為發展生意而演藝減產，她就向粉絲大派定心丸，保證絕不減產：「我好想試吓做生意，不過我本身唔熟悉呢方面，所以真係因為天時地利人和而成就咗呢個品牌，但你問我最大興趣，始終係自己演藝事業，我覺得拍戲上、演藝上都係自己嘅生意，係經營緊自己，所以一定將呢樣行先，生意就會量力而為，至於其他嘢我好深信我嘅拍檔。」

一切隨緣 與伴同行

Chrissie自從前年和髮型師陳偉成分手後，雖偶有傳出新戀情，但似乎都只是「冇米粥」，感情方面，Chrissie一切隨緣：「可能我都將時間擺咗喺工作上面，我覺得依家只係未遇到啱嘅人，但係又唔心急嘅，呢啲都係緣分啦，或者未遇到。」幸而Chrissie家人沒有在感情事給她壓力：「媽咪有時都會講吓，爹哋媽咪緊張自己仔女正常，但佢哋又冇催我搵男友，因為知我要工作，好難話催就會有。」

不介意圈內圈外

她坦言自己面對感情態度轉變不少：「始終人在不知不覺中成長，遇到唔同人，見識更加多嘅時候，生活、心態都不斷轉變，對伴侶都會有唔同要求，因為自己成長時都希望身邊伴侶同我一齊行。我又唔會特別要求伴侶喺生意上、工作上畀到咩支持我，有就梗係好，但我覺得工作同家庭可以分開，我反而唔想將工作同感情混為一談，所以都幾驚一齊做嘢，反而會多爭拗，但如果佢有呢方面知識，大家可以交流，咁至少有一個共同話題。我覺得圈內、圈外人都唔緊要，最緊要係兩個人夾到。」