杜德偉招惹粉絲 飛來艷Bra

杜德偉（Alex）一連兩場《杜德偉極杜世界巡迴演唱會Part II》前晚於紅館開鑼，身為Alex哥哥的杜德智、方力申、容祖兒、容媽媽、曾志偉、上山詩鈉、徐濠縈、蘇永康、謝天華及鍾鎮濤等捧場，並邀得呂方及台灣舞王羅志祥任嘉賓。操得一身肌肉的Alex與三點式女舞蹈員跳辣身舞時，主動伸手拍打對方屁股，還兩度感觸落淚。曾有網友認錯許志安是他，Alex大方提起舊事說：「可能走得太耐，好多人唔知杜德偉係邊個，大家有冇買錯飛入場？」

咀啖呂方當謝禮

全晚「亮點」落在最後一首歌，當Alex唱出《脫掉》時，全場即high爆站立，連天后容祖兒都起身跳舞。穿上大褸、長褲的Alex先被三點式女舞蹈員逐件衫撕開，剩下白色平腳底褲的Alex，最後親手扯開白色底褲，露出紅色珠片星星三角褲，全場尖叫聲不斷，Alex更360度自轉，讓歌迷無死角任睇「大鵰」。

掟上台的紅Bra內留有電話號碼及姓名。	性感女dancer與杜德偉在台上勁歌熱舞。	杜德偉開騷，當然少不得令人熱血沸騰的狂野舞姿。

Alex與首位嘉賓呂方合唱《不要重播》後表示有「逼」對方做兩場表演嘉賓，呂方聞言即爆料：「佢仲逼我唱《甜蜜十六歲》，我都就快56歲，再唱《甜蜜16歲》有少少尷尬。」Alex最後以「錫面」答謝對方，十分搞笑。期間，Alex感慨說：「你估我好鍾意喺萬幾人前除褲？冇人逼到我做唔鍾意嘅事，就好似結婚同生仔。」並大呻為以最佳狀態示人要食「六親不認餐」。

杜德偉在呂方臉上肉緊啜咀，冧得呂方瞇眼享受，場面搞笑。

演唱會後，杜德偉與工作人員齊齊祝酒慶功。

試打號碼問老婆

完騷後，有工作人員在台邊發現有歌迷掟紅色Bra上台，Bra內更寫有新加坡的電話及姓名，Alex受訪時說：「有見到，可能我哋脫得幾淋漓盡致，希望唔係即刻除出嚟。」由於Bra內留有電話，問到會否試打？Alex說：「一陣返去睇吓，畀老婆檢查吓先。（唔驚老婆扭耳仔？）唔會嘅。（有冇收胸圍作禮物？）冇。（收底褲？）底褲通常係我掟出去。」隨即透露上次個唱後遭歌迷投訴：「話我除完褲只係向一個方向，所以今次徇眾要求全場轉一圈。」對於，有指個唱門票減價速銷，Alex說：「冇聽到，作為歌手責任係做好表演、練好身體，無論嚟嘅人有幾多，希望佢哋睇完好開心咁返屋企。」事後，記者曾嘗試聯絡Bra內電話號碼「主人」，但未能接通。

採訪：音樂組