姜文杰兄妹拆夥 靠自己出頭

入行十幾年浮沉多時,姜文杰(Benji)一直努力洗走「秦沛個仔」之名,如今與妹妹姜麗文決意把Benji & Lesley拆夥,因發現大家對音樂理念有異,為免影響感情,Benji寧願拆夥,再花多點時間建立屬於自己的名聲!

於2010年以兄妹組合形式闖樂壇的姜文杰(Benji)與姜麗文(Lesley),去年參加浙江衞視《我不是明星》,已萌生拆夥念頭:「第一集包尾我反應好大,本身我同阿妹以Benji & Lesley組合身份出道3、4年,帶住獨立音樂嘅精神,明白喺香港呢個商業化社會比較輸蝕,到我哋決定分開發展,諗住借呢個機會試吓踏足內地,點知拎包尾,所以好痛心。」

跳3D舞出事

之後Benji主動約製作單位開會,分享一路至今的經歷,告白心聲:「我一直想辦法避開自己係星二代,但節目要求我哋去Sell家人,完全違背我嘅宗旨,但後來畀佢哋睇到香港人嘅堅毅,應承畀我哋靠實力比賽同嘗試突破。」Benji & Lesley入到總決賽卻發生意外:「跳3D舞落地企唔直搞到膝頭落地,痛到嗌唔出聲亦郁唔到,但我都堅持做個表演,我知冇香港Artist做過,好多謝電視台畀機會!」

他指最高興是看到自己進步:「由慢歌到又唱又跳,又試沙畫、現代舞、印度舞、第一次上台彈琴,仲有激光舞、3D舞,每次都好少時間練習,壓力大但成績唔錯,最後拎到亞軍我覺得無悔!喺呢個節目14場騷,好似開巡唱咁,更令我哋搵番自己!」

感激老竇借錢

Benji坦言對拆夥感可惜:「一男一女兄妹組合做到今日嘅成績好難得。」但直言大家想法不同,擔心影響感情:「對音樂嘅堅持開始唔同好易影響感情!呢樣嘢亦唔可以揹成世,我想獨立都可以生存,一開始我花十年時間去洗秦沛個仔呢個朵,依家不如花多一兩年洗走Benji & Lesley,去建立自己個名!」

Benji亦心知家人一直為他撐腰:「唔夠錢交租問老竇借錢,佢二話不說就畀我。我可以對音樂咁固執,都因為父母唔畀負擔我。入行後,老竇都會同我意見不合,到我第一次攞獎得到認同,最開心嘅係佢!」未來5年會是Benji的「最後一擊」:「我都要成家立室,唔可以再咁衝,搵到個同我捱杯麵嘅就心滿意足,隨緣啦!」

文:陳丹 

攝:劉斌 

場地:Three on Canton