蘇頌輝撈得掂心郁買靚車
百足咁多爪的明珠台節目主持人蘇頌輝（Desmond）數年前榮升做禮儀學校老闆後，似乎豬籠入水，日前他被本報發現低調現身車行睇「波子」，自言想「獎勵自己」的他生意果然撈得起！
連續兩屆擔任明珠台奧斯卡直播節目的主持人蘇頌輝（Desmond），畢業於美國名校普林斯頓大學，其後他毅然辭去銀行的高薪厚職，轉戰娛樂圈在明珠台擔任節目主持人，不過事業心重的他，實行多棲發展，數年前升呢做老闆開設禮儀學校。
唔貴唔睇
可能生意愈撈愈掂，日前一身西裝打扮的他被本報發現獨自現身灣仔保時捷車行，開頭睇中銀色保時捷的他，即直接上車試坐，之後又轉移目標往另一架紅色的保時捷，試坐兼打開車頭蓋研究。買車經紀亦主動上前招呼Desmond，二人密斟15分鐘後，Desmond就步出車行，再轉戰到其他兩間車行研究瑪莎拉蒂同BMW，唔貴唔睇！
本報致電Desmond問及他有關睇車一事時，他即大方表示心郁郁想買車獎勵自己辛勤工作：「其實嗰日係做完嘢去睇吓車啫。（想買車？）都想嘅，呢排工作順利，想鼓勵吓自己，不過買車要慢慢研究，睇車過程都係一種享受。本身都有一架七人車，方便做嘢做到攰嘅時候可以拉起簾就去瞓覺。」
享受駕駛
Desmond更自爆最冧價值400萬火紅色保時捷：「細細個就好鍾意Porsche，係睇中咗紅色嗰架Porsche。（幾時買？）未有咁快，要研究多幾個月，同研究車嘅朋友再傾傾先。」問到他會否成為玩車之人，Desmond就自言有部Dream car已經心足：「環保角度嚟講，根本冇呢個需要，我平時都係搭巴士地鐵，自己去做gym，或者私人時間嘅時候就會想享受揸車嘅樂趣，揸車當係放break。」
文：專案組
攝：李柏儒