任達華吳鎮宇麻甩同志
任達華（華哥）以鬈毛大男人形象在英皇電影《衝鋒車》中化身吳鎮宇「老婆」，演繹男人間之友情，但夥拍新導演劉浩良，卻有苦自己知，劉導要加長工時之餘，動作場面又拳拳到肉，拍至傷痕纍纍；劉導為電影做足九個月後期，華哥笑他十足王家衛！
華哥夥拍新進導演劉浩良的電影《衝鋒車》，是一部男人電影，將六、七十年代的大男人形象融合於現代化警匪故事，同時表達出男人的友情和責任，華哥形容自己在戲中是吳鎮宇的「老婆」：「周不時嗌交，但兩個係床頭打交床尾和，佢係男人，我係女人，一路都畀佢蝦、畀佢食住，爭在我冇留長頭髮，佢黐鬚，大家都以為我哋係同性戀。」
手傷足半年
一眾演員面對新導演劉浩良，展現出他們刻苦耐勞硬漢子的一面，「硬啃」麻煩，除了忍受數碼化話拍就拍的節奏，工時又長之外，華哥笑言：「新導演永遠都唔知咩叫替身，叫我哋自己做，咁受傷少不免喇，曾經拍過一場戲令到我隻手受傷咗半年，就因為嗰個演員根本唔識用假力，唉，諗諗吓，拍愛情戲真係冇咁辛苦。」
慢工出細貨
劉導亦坦承做導演比做編劇壓力大，一句說話足以令演員受苦，所以接受華哥的意見為同一場戲多拍幾個長度和角度，他說：「華哥除咗個人到之外仲帶多部機嚟，我問佢塞喺邊度，佢話唔好理啦，總之就roll住啦，總會有用。到後期剪接就出事，因為太多片，太多方法可以剪，最後我剪咗十八個版本，個後期做咗九個月。」華哥在旁打趣說：「呢個導演第日都係繼王家衛、杜琪峯咁，冇兩三年都拍唔到一部戲！」
戲中的重要角色「衝鋒車」，劉導笑言以小巴改裝而成，像真度實在過高，他說：「我覺得一般老百姓唔會分得出，只會以為係唔同型號。」他又大讚鄭浩南有如車手一般，足以駕馭經改裝後超負荷的「衝鋒車」。
文：影視組
髮型：Ritz Lam @ Hair Corner
化妝：Cathy Lau @ Utopia
服裝：Puma
場地：My Seasons 四季薈