張崇德冼色麗 娛圈辛酸笑住爆
張祟德從演唱會躍跳到「大舞台」，首次挑戰舞台劇，以「巨星」的角度揭開娛圈辛酸史！同劇飾演「萬能」經理人的冼色麗，則笑言親身經歷後要對經理人更好。
藝人張崇德與冼色麗合作舞台劇《香港有個BOLLYWOOD》，日前兩人為新劇綵排，首次參演舞台劇的崇德表示：「其實一直對舞台劇感興趣，今次有機會接受挑戰，平日演唱會冇咩難度，但舞台劇就要記好多對白。」
星爺式喜劇元素
張崇德會飾演一位過氣的天王巨星，但因意外與Bitto飾演的印度裔粉絲肉身互換，問到入行多年曾否遇到相似經歷的藝人？張崇德直言：「初初入行參加直播嘅頒獎典禮，有個好紅嘅男歌手一聽到唔係自己攞獎即刻兩眼通紅，到廣告時段仲衝咗入廁所，兩行眼淚湧落嚟。」他坦言藝人有時對自己期望太高，找不到出路壓力太大。講到新劇喜劇元素多，他自言是周星馳忠實粉絲，有學習其電影中的節奏安排。
明白經理人壓力
冼色麗則飾演張崇德的經理人，與崇德及印度裔演員Bitto有大量對手戲，她表示：「我會做個八爪魚一樣嘅經理人，做咗呢個角色之後，發現做經理人比想像中辛苦，其實佢哋好大壓力，情緒都好反覆，下次要對佢哋好啲！」
文：音樂組
攝：鄭家俊