徐子珊被粉絲圍嚇走相親老外

昨日徐子珊與安志杰（Andy）出席「莎莎美麗承傳37載」周年慶典，並聯同該公司的主席及行政總裁郭少明夫婦、女兒郭詩慧主持揭幕儀式。子珊明年也踏入37歲，她坦言年過30之後，年紀對她而言已沒甚麼大不了，談到感情一直交白卷，她認為女人不一定要結婚生子，自己亦不心急找對象：「啱啱過30歲嘅時候都有心急過，始終係一個關口，而且身邊嘅朋友都陸續結婚，不過，見住有啲朋友結咗又離，所以緣分好難講，隨緣，揀到個啱先。」

明星身份有阻礙

子珊笑言家人已經放棄，不再催婚，並自爆曾被家人安排相親，但最後沒有成功：「有次阿媽叫我一齊去探喺台灣做嘢嘅家姐，原來就係同家姐個美國同事相親，我哋去咗一個景點，遇到班馬來西亞嘅學生團，點知畀佢哋認出我，圍住要同我合照，嚇到個美國同事彈開200米，之後仲唔敢同我講嘢，原來明星身份係有阻礙，冇諗過外國人都咁介意，係有啲hurt，之後當然冇聯絡，阿媽都冇話再介紹相睇。」

郭少明夫婦為周年慶典主持揭幕儀式。

安志杰大手筆，包女友去旅行。

對於台灣天后蔡依林在社交網站轉發洛杉磯女副巿長的文章「女性不要在30歲前結婚」，認為女性不應讓30歲前要結婚的傳統觀念束縛自己，子珊亦大感認同，她說：「婚姻唔應該等同女性嘅價值，亦唔係咁去衡量婚姻，要了解清楚自己再去搵適合嘅對象。」

安志杰包JC旅行

而Andy被問到平時送甚麼給女友Jessica C.（JC）？他表示：「會一齊去旅行。（由你全包？）係，最近想去馬爾代夫，好耐冇去過。（同前女友謝婷婷去過？）冇，係自己去。（避開唔去同前度去過嘅地方？）唔會，JC唔會為呢啲事唔開心。」談到工作，Andy透露之前在北京拍攝電影《3D封神榜》，有指張栢芝因工作欠專業而被電影公司踢出劇組一事，他坦言：「我同佢冇對手戲，我唔係好八卦，之前仲喺酒店大堂見過佢，一星期後就發生呢件事，我都唔係好明白。」他稱之前曾跟對方合作，但不覺有任何問題。

文：名人組