唐詩詠自爆洪永城關係昇華
藝人唐詩詠昨日以tube top配pink pink裙到荃灣出席活動，司儀阮小儀以她與洪永城來做話題，又問她有否收過男方送花？唐詩詠稱沒有，小儀即指洪永城好鈍。唐詩詠透露想睇櫻花，又謂在櫻花樹下的表白很浪漫，但一定要男方做主動。
問到與洪永城現時的關係？唐詩詠坦言：「我哋仲係朋友關係，不過進入咗另一層次。（係咪同居？）唔會，我同我爸爸同居。（洪永城好鈍，想佢再主動啲？）佢做戲幾聰明，有時太主動會嚇怕人，再觀察吓，唔使咁緊張，愛情順其自然，我屋企人都唔急。（洪永城急？）我feel唔到喎，最緊要有耐性。（你考驗佢耐性？）唔係，睇耐啲，我清楚自己要乜。」
唐詩詠又謂不擔心洪永城稍後去北韓拍節目：「佢同金正恩咁似，OK啦，有歸屬感。（同佢去旅行？）同男仔去旅行有啲怪，會同女性朋友去，不過一班朋友去都OK。」對於早前被撞破上洪永城屋企，她說：「嗰次係朋友聚會，（你即刻縮沙？）唔想大家誤會。（拍拖會低調？）想大家專注番我工作。」