陳豪 蓋鳴暉 粵難愈愛
久未拍劇的蓋鳴暉於本月三十日（周一）首播的無綫新劇《水髮胭脂》中演女文武生，夥拍陳豪及麥長青等上演一段包含粵劇精粹的都市情緣，眾人更於劇中同時實演粵劇。蓋鳴暉為了演活「戲中戲」更弄至見紅收場，不過幸獲拍檔陳豪以「每日例啡」氹番！
乍看無綫新劇《水髮胭脂》的劇名，容易令人以為是古裝劇，皆因「水髮」及「胭脂」是大戲的常見用具，但實情此乃一套徹頭徹尾的時裝劇。故事圍繞蓋鳴暉（Joyce）飾演的豪爽女文武生、陳豪扮演的寸嘴室內設計師、飾「富二代」的麥長青（麥包）而展開。自幼無父無母的Joyce被經理人李司棋收養後努力學習粵劇，渴望擁有一個家的她誤打誤撞住進陳豪為女友精心設計的單位，更擺烏龍火燒屋！為此嬲爆的陳豪更聯同麥包打算施計趕女方離開，結果這對歡喜冤家在吵嘴的過程中放下成見，繼而互相欣賞，更成為人生中難得的知己。
吊眉流血兼含膿
本為粵劇名伶的Joyce直言為演活「戲中戲」，不介意「吊眉」長達十四小時，弄致雙眉流血兼含膿：「今次想將粵劇帶入屋，我哋拍時訂晒場地同布置等，仲吊眉吊足成日，拍完皮都鬆晒！仲流血同含膿，要每日搽燒傷膏藥。（咁搏命？）因為唔想浪費劇組時間，而且眉一定要戚成『關目』先醒目！唔好理我點摧殘自己，最緊要出鏡靚。」早年曾與陳豪合作的Joyce，大爆已為人夫的他開朗不少：「對上一次同佢合作拍劇已係十幾年前，當時佢cool到死又冇嘢講，不過依家佢有愛情同家庭滋潤就唔同晒。」
陳豪於劇中一改親民形象，化身衰格室內設計師。他初期會與Joyce交惡並寸爆對方，但後期因自負性格而慘遭出賣。不過原來他於戲外對全廠同事相當照顧，更自攜咖啡機為大家每日送上提神咖啡。Joyce對他讚不絕口：「佢帶咗部咖啡機嚟開工，晚晚煲咖啡畀全廠飲，仲不停講爛gag氹全廠同事笑！」
麥包整喊Joyce
化身「二世祖」的麥包則於劇中假意追求Joyce，更自爆因「假戲真做」整喊對方：「我叫佢嫁畀我嗰場戲令佢拍完三日都唔想見我，因為我真係整喊咗佢，佢嬲到成日講番起件事！」
文：影視組