任達華狗籠倒吊 醫足一個月
任達華瞓身演出新片，直言難忘泰國外景期間被蝨咬到全身紅腫，要靠消炎藥「吊命」，且日日被凌空倒吊狗籠至腰骨勞損，返港就醫足足一個月，難怪他形容今次是入行以來「肉體最受傷」的一次！即將出發到歐洲公幹的他，大爆老婆早前被盜用信用卡，幸他「眉精眼企」才免除無謂損失。
藝人任達華簽約英皇電影以來片約有增無減，除主演的電影《衝鋒車》4月上映在即，另一新作《殺破狼II》的海報及宣傳短片近日亦開始流出，《殺》片中扮演好警察的他，為救吳京奮不顧身，結果被奸人捉拿困狗籠虐打。
「肉體最受傷一次」
談到這場拍了足足15天的重頭戲，一向捱得的華哥不禁苦笑說：「片場做晒消毒工夫，我去到仍然被蝨咬到周身紅腫瞓唔到覺，第二日驚有菌即刻要搵醫生睇，畀咗啲消炎藥我頂住，點知跟手喺個狗籠被倒吊，唔上唔落要靠腰力支撐，最終搞到嚴重勞損，返嚟醫生一睇就知大件事，睇足一個月（醫生）先有進展。」
華哥形容今次是「入行以來肉體最受傷的一次」，但仍滿足於台前幕後的齊心努力：「劇本本來交代我要死，但導演覺得有我好睇啲，所以我最終留守到最後，真係好人有好報。」而即將出發到意大利拍新戲的他，今日仍會抽空到FILMART，為《衝》片及《殺》片站台宣傳，以作支持。
琦琦信用卡被盜
另外，華哥自爆太太琦琦早前往澳洲公幹，竟被盜用信用卡，他直言：「佢張信用卡畀人喺巴西買咗嘢、喺倫敦買咗機票……條數唔係好大，好彩我發現得早，即刻打去銀行勾番啲數出嚟，大家外出旅行用卡真係要小心啲。」
文：影視組