桂莉芙貴氣逼人 娜奧美潮着棗春裝
一眾名人為慈善都不遺餘力，早前在港舉行的愛滋病研究基金會慈善晚會，吸引了不少國際巨星到場，要在芸芸女星中穿得出色是最大挑戰。星級造型師郭慶彬（Ricky）就大讚奧斯卡影后桂莉芙白德露（Gwyneth Paltrow）身穿寶藍色連身裙是全場最美，簡單而高貴，反觀超模娜奧美金寶（Naomi Campbell）穿上最hit的棗紅色裙，着出另一番味道！
娜奧美金寶
「佢着棗紅色連身裙，幾似一粒黑珍珠，比全黑色仲精神，呢幾季都流行嘅棗紅色、暗紅色襯佢有另一種感覺。」
Paris Hilton
「打扮有啲俗氣，中間蜘蛛網形設計，唔算特別，佢以性感行頭冇新意，着鮮色仲好睇。」
Victoria Beckham
「全身白色好搶眼，cut out位若隱若現好靚，多啲脂肪都着唔起。傘裙款着得好淑女，改善到身形比例。」
Kate Moss
「復古得嚟幾有型，全黑打扮好似唔搶眼，但襯埋披肩好高貴，加埋鑽石嘅飾物喺手上，低調得嚟都好討好。」
前少女時代成員 Jessica
「簡單高貴，黑底紅點裙幾突出，露膊出嚟好靚，條裙令佢身形線條拉得好修長，加手鈪飾物會更靚。」
桂莉芙白德露
「四個字，簡單高貴，寶藍色連身裙比黑色更有光彩。露腰設計肥啲都着唔到，佢一頭金髮同雪白肌膚着呢類裙好靚。」
Profile
星級造型師郭慶彬（Ricky）的配搭功架深受女星讚賞，是型媽吳君如、「大美人」李嘉欣與「玉女掌門人」周慧敏等的御用造型師，在業界備受肯定。Ricky亦是一眾品牌之友，經常被各大品牌盛邀出席米蘭與巴黎時裝周，還會為品牌在尊貴活動上充當講師，與VIP分享與傳授配搭之道。