李彩華Bra辣闖商界

李彩華（Rain）在大陸發展多年，努力打拚下，三年間轉身一變成為過億富婆，今年更決定勇闖商界投資自家內衣品牌做老闆，全因睇中女人的購物欲。過往在港的時間不多，每次返港便與友人不停gathering，盡情吃和盡情買，她說：「好似自己咁，因為喺大陸拍劇都係食飯盒，冇乜選擇，正所謂好又一餐唔好又一餐，自己冇乜所謂，返到香港就會食番啲地道嘢，少食特別覺得好滋味，同埋返香港就會去shopping，好享受到舖頭購物嘅樂趣。」

網購天下機不離手

在她的字典裏，工作時努力工作，玩樂時亦出盡力去玩，通常留港不多於一星期，這一星期便會四處出動購物，各大小名牌專門店也留下她的足迹，購物成為她生活的一個重要環節。當人在大陸時，她便轉為網購，更成為狂熱分子，每天可以手機不離手，網購天下，問她最喜歡買甚麼？答案是甚麼也會買，她說：「返到大陸做嘢，我就會不停買，因為網購真係好方便，好便宜，試過最誇張一次，廁紙都網購，等郵件寄到酒店，連超市都唔使去。」現在她已成為網購高手，可謂百發百中。

李彩華是網購狂熱分子，買遍天下無敵手。	李彩華認為合適的內衣能改善女性的身材，變得更加好。	孝順女李彩華去年豪請父母到歐洲旅行，並將與母親合照放上網。

揀啱內衣身材變好

Rain因為鍾意買，而瞄準女人的購物欲，故對投資內衣品牌生意滿有信心，身材勻稱的她亦曾擔任內衣品牌代言人，認為內衣可以令女士身材變好，她說：「唔使靠醫學技術，揀一件適合嘅內衣都可以令身材好咗，令自己充滿自信，朋友見我的內衣宣傳照，都講笑話我身材變好，工作性感可以，但平時嘅自己就唔會咁着。」

她續說：「以前細個覺得着得太性感唔啱自己，依家大個咗，覺得靚嘅性感係OK，成熟美冇問題，自己個膊比較闊，着衫會好睇，其他部位正常囉！唯一覺得自己啲骨好大，都冇得削骨啦！哈哈。」她坦言不能接受整容，試過到韓國旅行發生奇遇，有港人女子，鼻子包上紗布，還滲着血水在街上行，最可怖的是，對方還竟然要求跟她合照，最後遭她婉拒，她笑着說：「都係等佢康復咗先啦！」

等好劇本返港拍戲

勇闖商界的同時，她沒有放棄過演藝事業，在大陸劇接劇甚為吃香的她，直言很享受在內地工作的日子，未有想過回港拍劇，她說：「冇諗過，內地好多劇，之前拍劇我會用廣東話，啲人唔明我講乜，依家已經可以用普通話，工作人員都讚我有進步，況且留喺香港時間唔多，除非有日有個好好嘅劇本好鍾意嘅，都想囉！」

阿媽靚湯養生

Rain入行多年，樣貌身材保持有道，她的養生之道全靠媽咪靚湯養生。每天除了敷面膜，她覺得外敷內服同樣重要，Rain在大陸拍劇，媽咪都會陪伴左右，靚湯每天奉上，她說：「媽咪仲會煲中藥畀我飲，每次返香港就會執中藥，一次過買夠三個月分量，我有一個行李篋都係全部放中藥。」

採訪：Tracy Leung

攝影：劉智源

服裝：Cecilia Yau

化妝：Emily Ngai