沈震軒 蔡思貝暗戀變兄妹

踩單車長大

蔡思貝：貝

沈震軒：沈

貝：其實我同踩單車都幾有緣分，以前曾經喺新西蘭踩單車搵食，住女宿舍送外賣賺錢。

沈：咁囂張嘅你？

貝：喺德國我又係踩住單車周圍走，以前選港姐個自選項目我又係揀咗喺台灣踩單車，所以今次《衝線》又係踩單車又係去台灣。

沈：唔怪得之你咁大膽啦！我同你唔同，讀書時期以單車做主要交通工具，日日踩單車返學放學，平時唔驚踩單車，幾有把握，但就係因為呢個心態所以喺之前拍劇一個唔小心……

貝：不過我覺得你都算專業吖，如果係我受傷斷咗隻手，會驚到唔敢掂單車！

蔡思貝與一眾型男拍《衝線》，難怪緋聞傳得熱烘烘！	個性活潑的蔡思貝，對被指發姣無計可施。	蔡思貝與周志文及溫家偉開餐，三人玩到興起。

沈：所以我咪叫你小心啲囉！你咁大膽，仲要係女仔，有條疤的話幾難睇！

蔡思貝hard sell自己好女仔，沈震軒即無視對方。	沈震軒	二人拍攝時，表情動作相當有默契。

貝：其實今次能夠拍青春劇真係三生有幸，羅仲謙都講過話呢一次青春劇無份，下一次就唔輪到你，咁都畀我哋撞到正真係好好，以前細個睇四葉草好大感觸，青春劇又咁熱血！

拒絕溫家偉

貝：最初我對緋聞嘅觀念係拍劇啫，點會有緋聞，後尾先發現原來咩都有可能！由第一次套劇傳緋聞就係我同你，嗰次都係得啖笑，到每一個（劇中男演員）都寫，就有困擾，惟有當幫套劇做緊宣傳。

沈：你不如對住個鏡頭講，你依家個男朋友係邊個咁咪得囉！

貝：吓？我冇男朋友喎！我仲等緊人追。最無稽係同溫家偉傳緋聞，我同周志文、溫家偉喺戲入面冇感情，但本身未拍之前係好朋友。周志文靚靚仔仔同我傳就無乜嘢啦！但溫家偉……唔係話佢唔靚仔，但我同佢個type實在太……

沈：點知你鍾意咩啫！

貝：我同佢真係好似姊妹咁，真係乜嘢都講，我、溫家偉同周志文三個真係冇咩唔知，係好好朋友，見到我哋相處方法好似兄弟或者姊妹乜都好啦，總之就唔會係情侶囉！

沈：我都有同你講嘅，咁多緋聞可能真係你平時做咗某啲行為，真係要小心啲。

貝：其實未有呢啲緋聞同花名之前，我係成日畀人話我黑面、高傲唔理人，以前無乜出聲，依家畀人話發姣，真係好極端，好似做乜嘢都係錯，所以你先成日教我要攞中間位啫。

恨淒美愛情

貝：我由頭到尾對住你都係當係阿哥，無一刻真係鍾意過你，你呢，有冇掙扎過？

沈：掙扎過？即係有冇愛上你咁話？

貝：其實蔡思貝個人咁好，畀我都一定會鍾意佢啦！

沈：（無視）其實拍嘅時候，都會有一種妹妹嘅感覺，我做親啲角色都係冇好結果，永遠都係默默守候嗰類，劇入面見到你同阿謙兩情相悅，同時又希望呢個女仔得到幸福，所以選擇喺背後守護住，呢種愛情係幾浪漫。

貝：幾淒美！

沈：你鍾意呢種嘛係咪？你諗吓，有個男仔喺你身邊，但佢永遠當你係妹，而你知道佢鍾意你亦願意守護你。

貝：唔係呀，我成日都話，如果我係一個女觀眾的話，一定會鍾意你多過羅仲謙o架喎，因為你係淒涼嗰個，同埋你真係對我好好吖嘛！

沈：當你係觀眾吖嘛！

八十後之談

沈：其實九十後好幸福，但佢哋比七、八十後更加努力，因為佢哋接觸嘅嘢比我哋多，要有成就付出努力會比我哋更多，先會得到認同，變相嚟講係辛苦，所以有時佢哋會放棄。

貝：八十後嘅經驗係教咗我好多嘢，喺現實生活中有時我自以為是，佢哋就會話畀我聽「我都試過咁啦！我嘅經歷咪係咁囉！」佢哋分享經驗之談，係希望我可以避到唔需要受嘅苦。

最重要唔好盲目追隨，例如喺我十幾歲已經發掘咗鍾意嘅嘢，去追尋夢想嘅時候，佢哋就一路跟隨其他人步伐，到廿幾歲先可以真正發掘自己。

後記

二人在訪問之初高談闊論，又不時互相嘲諷展現演員默契，但在探討緋聞時，思貝顯然眉頭深鎖，分外認真，可見仍屬新人的她正面臨傳媒的壓力。坐在一旁的沈震軒則對八、九十後獨有見解，期間更說得頭頭是道展現深重使命感，十足一位大哥哥！

文：影視組

攝：劉斌

沈震軒化妝：Janice Chan