Aka Heidi牛一 「燭」發SG內鬥
組合Super Girls（SG）隊長Aka及成員Heidi早前生日，經理人公司特別為兩人舉行生日派對及公司聚餐，姊妹情深的SG齊齊捧蛋糕影相，更鬥快許願及吹熄蠟燭，搶盡兩位「壽星女」風頭，難怪Aka及Heidi慘叫「喂呀」投訴！
組合Super Girls所屬的經理人公司Jam Cast日前舉行公司聚餐，旗下藝人傾巢而出，包括組合SG、蔡穎恩、方珈悠、模特兒界的余香凝、陳詩欣、陳嘉琪等，適逢SG隊長Aka及成員Heidi剛剛生日，公司特別送上生日蛋糕，氹得兩女笑逐顏開。
姊妹齊許願
SG姊妹情深，推出蛋糕時五女表現興奮，期間因左推右推搞到生日牌都跌爛，最抵死是兩位壽星女許願時，其餘成員Cheronna及Jessica又爭着一齊許願，還齊齊鬥快吹蠟燭，惟獨Yanny最乖企在側邊做「花生友」，由於蠟燭被Cheronna成功吹熄，搞到Aka及Heidi慘叫「喂呀」，場面搞笑。
望行桃花運
Aka透露生日當天與多位好朋友食飯慶祝，問到有否心儀對象相約？Aka表示沒有，但就自爆早前情人節收到一束鮮花，更是男性所送，她笑說：「係呀，不過係男歌迷。」單身多時的Aka希望羊年能夠搵到另一半：「今年桃花應該會好啲，因為新年買咗棵桃花，開得好燦爛。」
文：音樂組