Niki腳趾骨裂照撐豆斗
周麗淇（Niki）昨日負傷出席時裝品牌開幕派對支持沈嘉偉與邱淑貞（豆斗），Niki自爆日前發生家居意外，導致右腳趾骨爆裂，已打石膏數天的她，為要漂亮出席活動竟自行拆了石膏，認真是為靚博到盡！
周麗淇昨晚出席「Chloe SS15 Capsule Collection for I.T開幕派對」，撐I.T老闆沈嘉偉，老闆娘邱淑貞亦有現身。Niki表示自己負腳傷上陣，還講到「案發經過」：「都唔知點解可以咁發生，我冇着拖鞋去開門，點知攝咗隻右腳入門度，之後就見到甩咗啲皮，但冇流血，嗰晚即刻去咗醫院，醫生話我第三隻腳趾裂咗骨，（幾時好番？）裂骨要100日，啲骨先可以生埋。打咗幾日石膏啦，今日因為貪靚拆咗，依家唔濕得水，喺屋企腳要抬高擺。」
獲媽咪家姐照顧
問Niki是否犯太歲？她說：「唔關事，（有冇話畀男友知？）佢知，但冇特別強調，嗰日啲腳趾又腫又青，五隻腳趾得尾趾冇事。」她表示工作均押後，並笑稱現與懷孕的家姐周汶錡相依為命：「大家都唔可以周圍走，變咗媽咪照顧我哋，煲湯畀我哋飲。同埋因為我唔企得耐，家姐都有照顧我。媽咪話我哋兩個留晒喺屋企，團聚時間多咗，可以講係因禍得福。」
沈月想做模特兒
而豆斗表示與女兒對時裝各有喜好，指她鍾意的，女兒未必喜歡，並透露大女沈月有意當模特兒：「我同佢講高啲先，叫佢打多啲籃球，（唔反對？）做模特兒幾好，又可以扮靚。」她續說囡囡會自行揀衫，問女兒是否有時裝意識？她說：「唔可以用我角度去睇同判斷一個10幾歲小朋友嘅品味，等佢自由發揮。」
文：名人組