子丹變奧巴馬 囡囡認錯老竇
「宇宙最強」甄子丹每次拍戲演乜似乜，造型百變。好似早排子丹化身的「肥版子丹」拍攝床上用品廣告，囡囡Jasmine就嬲媽咪汪詩詩攬住其他男人而鬧出笑話。而詩詩又自爆囡囡在兩歲的時候，將拍戲曬黑了的子丹誤以為是美國總統奧巴馬，更在街上叫錯老竇，非常搞笑。
連續三屆擔任「打吡大使」的甄子丹昨日現身沙田馬場出席《賽馬香港打吡大賽》，同場的仲有子丹太太汪詩詩、汪圓圓、蔡加讚、黎諾懿伉儷、鄧鉅明伉儷、楊婉儀、羅霖等。
遮胸肌唔益粉絲
電影《葉問3》即將開拍，子丹早前透露導演葉偉信曾要求他減30磅，子丹即表示已經冇咗肚腩，「依家係啲胸肌出晒嚟，因為我自己天生麗質，所以胸肌都好難減。（要紮胸？）未試過呀，着啲衫含蓄啲，唔好show事業線，令fans有幻想。」
講到早排子丹化身「肥版子丹」與太太拍攝床上用品廣告，而詩詩表示囡囡Jasmine和媽媽都不能認出子丹。今次詩詩再爆囡囡兩歲時曾經因為子丹拍戲曬黑而認錯老竇，「當時個女兩歲，我哋嗰時住喺加拿大，跟住佢（子丹）返咗香港拍戲，個女喺街度見到黑人叫爸爸。」子丹搞笑就話：「以為我係奧巴馬。」
黎諾懿ready造人
另外，藝人黎諾懿與太太李潔瑩（Nicole）恩愛現身，由於仍然拍緊處境劇《愛‧回家》的諾懿坦言與太太未有「好消息」公布，「諗住等《愛‧回家》完晒先，可以完美啲。（造人大計會在honey moon時進行？）順其自然啦，其實都ready，但唔強求。」
文：名人組