楊怡狂收玫瑰補數

楊怡、鄭嘉穎及林夏薇等昨日到坑口宣傳無綫劇《天眼》，大會安排魔術師表演魔術，劇中飾演孖生兄弟的嘉穎及陳展鵬隨機抽出演員照片，最終同樣揀中楊怡，令人驚嘆兩人果然有心靈感應。

林夏薇爆林峯捧場

楊怡被問前日如何歡度白色情人節？她說：「係咩？完全唔知，我連中國情人節都冇為意。（同羅仲謙都係唔重視節日？）我只記得阿媽生日同大節日，（補祝？）唔啦，都唔興慶祝嘅，元宵都冇慶祝！（有睇謙仔套《衝線》？）有睇開頭，聽講收視OK。（個劇送單車答謝觀眾？）等我都抽吓先！」雖然過了平淡白色情人節，但楊怡昨在活動上獲演員送上大會安排的玫瑰補番數。

林夏薇則高興演出獲網友激讚，她說：「好開心工作得到認同，好感動，但我冇喊。（有信心攞獎？）我一向唔諗太多，最重要係過程。（開心撇甩『林峯堂妹』之名？）都係o架，時間證明一切。（林峯有冇睇你啲劇，定係忙同吳千語放狗？）一路都有聯絡，佢點會唔理我？咁啱睇到會打畀我，不過最近就冇。之前佢話佢睇番自己做戲，感覺好怪，但睇我就冇。」

羅仲謙（資料圖片）	楊怡獲大會送贈多束玫瑰花。	鄭嘉穎（左）與陳展鵬心有靈犀，同樣抽中楊怡的相片。

嘉穎媽咪愛煲韓劇

鄭嘉穎則預告劇集尾段很精彩，他說：「觀眾眼睛雪亮，一定要拍高質素嘅作品至可留住佢哋。（收視有期望？）依家唔同我初出道，網絡出現改變人嘅娛樂模式，我阿媽都識上網啦！（你媽咪上網睇你個劇？）佢當然有睇TVB，但上網就睇韓劇同內地劇。」

文：影視組