鍾浠文好飾鬼

PART 1：來港發展當玩票

我2008年入行，呢幾年間轉變得好大，我記得當時上海間模特兒公司問我想唔想去香港發展，我話好呀！其實我一心係抱住玩票性質嚟香港發展，當遊客心態嚟玩吓，都冇乜專心工作。

似徐子淇有着數

點知……後來啲人話我似千億新抱徐子淇，仲畀個「翻版徐子淇」稱號我，之後工作接踵而來，亦多咗人留意我，搞到我不期然感到壓力，就係呢種無形壓力，令我作出反省，於是我同自己講，唔可以再玩玩吓，一定要努力工作，為未來着想。

PART 2：宅女遇事業樽頸

我當時離鄉工作，香港冇朋友，自己廣東話又唔靈光，每日都只係出門做嘢，收工就返家，連公司同事都話我係宅女。我發展初期係好順利，但去到中期就覺得自己去咗個樽頸位，唔知當時經濟唔好定我冇咗新鮮感，工作量愈來愈少，令我鑽咗入牛角尖。當時我問自己，以前工作唔係好順利嘅咩？啲客好鍾意我o架？點解依家冇乜人搵我做嘢？

Zelia（左）與好姊妹倪晨曦齊拍廣告。	事業發展多元化的Zelia曾任林峯個唱表演嘉賓。	周柏豪邀得Zelia拍MV，更與她親吻。

怨天怨地極灰心

我覺得自己好冇用，嗰時又多新人，真係覺得自己連新人都不如，搞到成個人都謝晒，冇晒上進心，只係識怨天怨地。

Zelia坦言「翻版徐子淇」的稱號，為她增添無形壓力。	經營咖啡店期間，Zelia吸取了不少經驗。	Zelia（左二）與一班好姊妹感情要好。

PART 3：姊妹開解現動力

不過，經一班好姊妹陪伴同開解，再加上我係山羊座，係理智型，好快就諗通重新振作。我覺得唔可以再等運到，之後就同朋友投資開咖啡店Ghost Cafe，創業初期係辛苦，日日做足12個鐘，但好開心。嗰時我一唔使做嘢，就會返舖頭打躉，我仲接觸到唔同層面同個性嘅顧客，喺同顧客閒談中會體會或領會到一啲嘢，令我學識書本學唔到嘅嘢，好明白邊學邊做吸取人生經驗嘅重要性。

Zelia希望以踏實步伐發展珠寶生意。

Zelia為媽媽（左）經營的珠寶店任客席設計師。

客串珠寶設計師

最近我有新發展，就係幫媽媽經營嘅珠寶店擔任客席設計師，鑽研珠寶鑽石首飾，希望有一日可以穩坐珠寶女王寶座。

後記：點解做咗鬼？

鍾浠文點解有個花名叫鬼姐？事緣有一次周柏豪將一張鍾浠文披頭散髮、見唔到樣嘅相放上網，然後叫人估吓相中人係邊個，有人見到張相，講笑話似鬼，結果鍾浠文就成為鬼姐。

場地：潮州私房菜林家御廚（跑馬地）

攝影：張福宏