林峯爭住執金 千語：佢要Man
林峯和吳千語拍拖三年以來愛得難捨難離，更認定對方為結婚對象。昨日新一期《好報》披露林峯和千語BB孖咇拖狗遊赤柱時，全程充當女友保鏢，更讀餐牌安排飲食，甚至抱病仍搶執狗屎！昨日吳千語對於男友的「搶金」行為笑說：「可能見多人喺度，佢要Man啲！」
林峯化身為「BB戰士」上陣，和千語BB在赤柱拍拖放狗期間，當正女友為三歲BB般照顧！據知千語BB因拍戲將要離港三個月，林峯分秒必爭，戴着口罩及出動冷帽與頸巾，明顯抱病都頂硬上，同時為氹女友又要玩情侶裝「白之戀人」。期間林峯對千語BB全方位深入照顧，包括保鏢上身護花外，期間為免餓親女友，先安頓女友到茶座，之後買乳酪雪糕餵狗以逗女友歡心！
廿四孝男友 讀埋餐牌
餵狗後，林峯立刻啟動「語音模式」，朗讀餐牌上所有菜式給千語BB邊聽邊揀！而最肉緊的是，當他見到千語BB清理狗便便時，林峯即兩度伸手「搶金」、想代為清理，千語BB為免便便傳來傳去，即快手快腳親自扔入垃圾桶！「搶金」任務失敗，但林峯未有鬆懈，當狗狗行多兩步又要尿尿時，一眼關七的他先指揮同行的友人拿水過來，親自沖走小便！
將分隔異地 難捨難離
昨日千語出席活動時，承認大家將因工作而相隔異地，問到當日林峯「搶金」一事，她笑說：「平時佢都有執，不過冇爭，可能當日見多人喺度，佢要man啲啩！」她續說雙方未有結婚計劃。另千語昨日接受本報電話訪問，也不忘大讚「搶金」的林峯：「咁都係一般狗主嘅責任嚟。（覺得男友細心？）佢咁細心體貼，我都好欣賞！」
文：專案組