翠如淚迎安信源 心繫蕭正楠
無綫女神黃翠如前晚偕韓國男團god成員安信源（Danny），為港韓合拍劇《七天的浪漫》到尖沙咀拍攝初次邂逅場面，戲中翠如因失戀爆喊，吸引半百外地旅客圍觀，兩人更互笠高帽大讚對方靚仔靚女，不過心繫男友蕭正楠的翠如說：「冇人可以同佢比！」
黃翠如與韓國男團god成員安信源前晚現身尖沙咀，為浪漫愛情劇《七天的浪漫》拍攝兩人初次邂逅的場面，劇中他倆恰巧剛失戀，Danny從巴士尾隨翠如落車，又上前偷望突然爆喊的翠如。由於現場有不少韓國、內地及外籍旅客認出二人，瞬間已吸引半百途人圍觀拍照。該劇乃無綫與韓國KBS電視台、CMB有線電視台合拍，劇組今次動用五部大小旅巴、七人車，更租借開篷遊覽巴士拍攝。
言語不通交足戲
韓流始祖之一的Danny表現親民，前晚接受本報獨家訪問時表示，首次跟香港藝人合作，更讚翠如BB靚女之餘，也是優秀演員：「雖然我們言語不通，但翠如都交足戲，令我也知道要做乜，演得好舒服。（拍親熱戲尷尬？）因為係做戲，所以唔尷尬。」
Danny又向翠如學了廣東話，更即場講「多謝」、「女仔」，他謂：「劇中翠如係咁講廣東話，所以學到少少。」Danny希望此行可四處遊覽，更想食點心，又盼能跟黎明等港星合作。
兩日冇瞓捱出病
翠如亦讚Danny靚仔，問男友蕭正楠還是Danny靚仔？她笑道：「冇乜人可以同佢（蕭正楠）比較，（Danny都輸？）冇刻意諗，Danny係典型韓國靚仔，god喺韓國好出名，好似望住靚仔偶像。」問有否因與Danny拍親熱戲令男友呷醋？翠如謂：「唔會，佢拍呢啲多過我。」
另外，昨出席新劇拜神儀式的蕭正楠表示，翠如因忙於拍韓劇試過兩日冇瞓：「之後佢病咗，我真係心疼。（點錫番佢？）盡量搵時間食飯見吓。」
文：影視組