阿Sa感激前輩力撐：當攞咗影后！
蔡卓妍（阿Sa）破格演出新片，贏盡口碑之餘，還為她換到一張「金像影后」入場券。對於外界推測她今次勝算甚高，阿Sa謙虛表示一切平常心，笑言已當自己「攞咗」。這位準影后獲不少品牌「虎視眈眈」，爭相贊助她走金像獎紅地氈，令她出現「選擇困難症」！
阿Sa放下淑女形象，演出英皇新片《雛妓》，挑戰性感底線，電影上映前她戲內表現已贏盡口碑，結果上映6日收逾800萬港元票房，更令阿Sa入圍角逐本屆金像獎「最佳女主角」，前輩如劉嘉玲、黃秋生及曾志偉等，先後於人前明言睇好阿Sa今次「開齋」。她昨晚現身尖沙咀戲院謝票時，被問到可感壓力？阿Sa坦言：「近日收到好多前輩嘅短訊，有鼓勵、有對我演技嘅意見，好想列印晒出嚟，以後如果事業唔如意，可以攞番出嚟睇鼓勵自己。」
心大心細揀戰衣
對於得獎與否，阿Sa覺得已不重要，並視今次為自己事業上另一里程碑：「依家當自己『攞咗』，個心反而輕鬆咗，之前會覺得unbelievable（不可相信）囉，總之好心滿意足，不過如果有獎梗係開心。」據悉，不少品牌睇中阿Sa近日人氣飆升，主動聯絡其經理人公司及造型師，希望可以贊助她走下月舉行的金像獎頒獎禮紅地氈。由於有多個選擇，亦為免「順得哥情失嫂意」，阿Sa坦言至今費煞思量，對當晚的打扮造型未有最後定案。
下周舉行慶功宴
由於票房走勢凌厲，電影公司初定下周舉行慶功宴，且第一時間mark實阿Sa的檔期，集齊台前幕後預演慶祝她榮升影后。當問到近日外傳她同男友陳偉霆「逼婚」一事，阿Sa沒好氣的謂：「澄清咗10幾次，講到口臭嘞，總之暫時冇呢方面打算。」
身為阿Sa拍檔的柳俊江昨晚在謝票活動上，亦對她的演技讚不絕口，認為對方倘若得獎亦是順理成章：「拍嘅時候都覺得佢好好嘞，攞獎唔出奇。」他又笑指自己與阿Sa的床戲，在拍攝前要經太太批准，足證阿Sa魅力非凡。
任達華驚老婆鬧
由於飛機誤點關係，任達華匆匆趕到會合阿Sa及柳俊江謝票，現場氣氛熱鬧。華哥接受訪問笑言：「老婆（琦琦）未睇套戲前，我都驚自己同阿Sa嘅戲份太激，返屋企要跪洗衫板，點知老婆睇完好感動，讚我演得好，仲喊到眼紅面腫，我即係唔使跪啦。」
文：影視組