張震高鼻B女出世:不可思議

台灣型男張震與老婆莊雯如結婚一年多便「造人」成功,昨日兩公婆上載BB腳印相自爆張家喜獲小千金,張震透過經理人表示初為人父,感到很不可思議!莊雯如則開心Share囡囡的精靈靚樣,五官精緻鼻高高的小千金未長大已是美人胚子!

台灣男星張震前年迎娶拍拖4年的女助手莊雯如,結婚不到一年,去年10月就爆出張震老婆懷胎3個月。直至昨早,張震終在微博報喜,上載BB腳印相宣布升呢做爸爸,他興奮留言:「新成員報到!」平安誕下張家小千金的莊雯如亦開心Share愛女靚相,見B女戴着粉紅帽仔,瞓覺時舉起一雙小手,面珠紅粉緋緋,鼻子高高,出世不久已是美人胚子!而張震哥哥張翰亦興奮表示自己榮升「大伯」。

偉仔王家衛祝福

張震事後亦透過經理人跟大家分享初為人父的喜悅,他說:「覺得很不可思議,很開心,母女都很健康,謝謝大家關心。」與張震分屬好友又曾多次合作的梁朝偉亦表示張震有與他報喜訊,偉仔說:「佢今日(昨日)有發BB女照片畀我睇,好得意、好靚、好可愛!好替阿震開心,我知佢一定好開心!恭喜佢!」與張震亦師亦友的大導演王家衛亦戥張震開心:「恭喜張震同佢太太家庭增添新成員,好戥佢哋高興!祝張震家庭美滿同小朋友快高長大!」

忙宣傳搵奶粉錢

其實張家小千金「未出世、先旺爸」,皆因去年10月張震入圍金馬獎角逐最佳男主角,又在年卅晚的央視春晚中被讚是全晚亮點。而張震出身演藝世家,其父張國柱為台灣資深演員,縱橫影壇30多年,哥哥張翰更是演而優則導。過往張震拍戲時亦好學不倦,故被冠以「學霸」稱號!未知張震會否想囡囡繼承衣鉢,栽培她做女版張震!

另外,好爸爸張震羊年亦要密密做賺奶粉錢,其所屬的公司亦透露張震先要忙宣傳新片:「有好多劇本睇緊,嚟緊要宣傳新戲,《道士下山》、《赤道》、《聶隱娘》。(吳京搵佢拍戲?)都好想同吳京老師合作,仲有好多嘢傾緊。」

文:專案組