李彩華百Bra齊放 越Cup鬥娜姐
坐擁八千萬身家的李彩華（Rain）透露今年有意成立內衣品牌，投資七位數字升呢做老闆，並揚言無懼與已開設自家內衣品牌的周秀娜（娜姐）打對台，還信心爆棚地大呼自己定必比對方更性感，以及可讓平平無奇的身材變成魔鬼body！而娜姐則表示百Bra齊放，無任歡迎！
城中「小富婆」李彩華昨日出席護膚品牌活動時透露，今年決定勇闖商界，豪擲七位數字建立自家內衣品牌及發展護膚品生意，榮升老闆！早前她曾提及希望找到適合的舖位後才扑錘進軍商界，惟了解行情的她洞悉現時舖租只會無了期上升，故銳意決定一邊搞生意一邊找舖位，以免錯失良機。她還表示曾與多位女性朋友商量其生意大計，並稱眾人均十分認同女性的內衣和護膚品市場極具生意潛力，因每位女性都愛扮靚，必定捨得揼本買貼身必需品，堅信有得做！
賣點內衣外穿
曾擔任內衣廣告代言人的她表示受品牌高層影響而萌做生意念頭，誓要於今年自資做老闆，創立內衣王國，她說：「都想做老闆好耐，因為內衣廣告嗰邊公司嘅人，之前都有叫我夾份一齊開舖，依家決定咗主要向內衣同護膚品方面發展，（唔怕市場競爭大？娜姐都有開喎！）競爭都真係大嘅，不過以前啲內衣都係以保守同普通款式為主，我嘅內衣生意款式會更加In（潮流），會做到可以『內衣外穿』四個字，到時露帶都得。」問到向成功開設自家內衣品牌的娜姐越Cup挑戰，會否怕對撼及與對方認識嗎？她說：「我唔識佢o架，但我唔驚比較，（佢好性感喎！）我會更性感，加埋內衣可以外穿就係我嘅賣點，自己一定要靚，就算唔係超好身材着咗我嘅內衣都可以變超好身材！」
會投資7位數
她又透露自己除落手落腳設計內衣款式外，還會以超性感造型充當生招牌，實行搏到盡：「我會設計埋款式，（做生招牌？）自己品牌梗係會做埋，同埋我覺得係幾靚嘅一件事，唔可以用黃色眼光去睇，內衣係女性嘅必需品，（會投資幾多錢？）坐底7位數字，另外護膚品同化妝品嗰邊都已經開始傾緊內容，（係咪會開埋地舖？）仲搵緊地方，諗緊地舖定樓上舖，其實地舖會好啲，但成本真係高好多。」
談到近年較少在港，她笑稱返港的日子如像度假一樣：「我新年就同屋企人去咗旅行，不過之後都要返北京做宣傳，（你之前行街被影到話你個造型娘爆？）係咩，我冇睇，我諗住平時出街可以casual（休閒）啲，所以咪冇打扮，以後shopping都係要化行妝啦，要登台咁出街，不能失手，隨時準備好自己。」
文：名人組