田蕊妮與澤同行甘苦十年
田蕊妮與老公杜汶澤今年踏入結婚十周年，十年感情得來不易，當中遇過感情危機及阿澤患病，猶幸兩人患難見真情，齊齊跨越障礙，阿田更自言是個幸福人妻！阿田過檔無綫後再創事業高峰，前年更獲封視后，惟受母親癌症復發影響而大受打擊，一度想過放棄如日方中的事業，陪母親共渡難關！雖然已經事過境遷，但阿田談及母親患病仍然哽咽！經歷過人生高低的阿田，感恩一路上有阿澤支持，很珍惜與至愛相處的每一天！
媽咪患病 萌放棄工作
阿田勇奪視后，人生走到其中一個高峰，然而此時卻遇上母親患病，也正因此讓她體會到親情的可貴。
人生弔詭嘅係，喺你最開心嘅時候，原來就會遇到考驗。前年攞咗視后後，媽咪突然Check到胃癌復發，喺切胃嗰個傷口度。嗰時面對好多選擇，例如做唔做手術？繼唔繼續工作？搵咩醫生幫佢？點樣處理自己嘅情緒？好彩老公一路支持我，就算幫唔到我決定，起碼佢喺我隔籬，呢個已經係個好緊要嘅支持！我亦好多謝珍姐（曾勵珍），本身我仲有套劇要拍，但珍姐同我講：「唔緊要，劇有好多可以拍，但屋企人身體好緊要，你休息吓、照顧吓屋企人！」
收到消息後，我同媽咪傾過不如唔開工陪佢，但媽咪聽完竟然問我係咪冇嘢做，真係「養兒一百歲，長憂九十九」，媽咪到依家都仲係擔心我先。後來問過醫生意見，佢都叫我繼續工作，否則會令媽咪心理壓力好大，所以我會分配時間，例如拍戲中間有一個鐘頭break，我會返屋企食飯，一放假又會黐實媽咪，爭取時間見佢，媽咪可能都有啲嫌我煩，哈哈！依家諗番，當然唔想見到屋企人受苦，但正面去諗，起碼媽咪畀我有個準備，畀個機會我盡番做女嘅責任照顧佢。
當貓貓係女
我又諗過生ＢＢ還媽咪想抱孫嘅心願，但依家我哥哥有個咁可愛嘅ＢＢ，我冇再諗要生，我隻貓MoMo已經係我個女。依家過咗一年，上個月媽咪磅重肥咗５磅，我好開心，當然仲會緊張，但我會提醒自己放鬆啲。慶幸我哋屋企好有默契，例如我同爸爸會互相安慰，哥哥又搬返去同媽咪住，等媽咪見個孫多啲。因為心情對病情都有影響，所以哥哥個Happy Baby，令成家人好歡樂，亦令媽咪心情好好。
睇情慾戲 絕不呷乾醋
兩公婆雖然都是演員，但對方拍親熱戲時會不會感到不是味兒？
好多人問我，會唔會介意阿澤拍情慾戲，其實真係冇，我都係演員嚟o架嘛，我對自己亦都有信心！反而我幾欣賞AV女優佢哋咁專業，講真你要一個演員咁做，未必個個做到。其實演員去到現場就係嗰個角色，佢唔係杜汶澤，我唔係田蕊妮，我唔會諗咁多嘢，背負住咁多嘢去演戲，唔係一個合格演員，諗咁多嘢去演場戲亦唔會好睇。曾經有演員問我同一樣嘢，我問番佢：「你係咪演員嚟o架？演戲知咩事o架嘛！」
人生最悲 老公患怪病
田蕊妮與杜汶澤結婚10年，共同經歷人生悲喜，尤其是阿澤早前曾患上怪病，令阿田擔心不已。
呢十年入面當然有喜有悲，但我同阿澤已經過咗最激烈嘅時間，依家覺得只要兩個人一齊就係「喜」，有咩事發生都好，只要一齊就一定過到，所以我好珍惜。例如我哋有時夾唔到時間，我收工返到屋企，見到佢瞓緊覺都已經好開心。「悲」就真係佢患「米勒費雪症候群」嗰陣，我仲同佢講：「你唔好早死過我呀！」因為我已經慣咗依賴佢，所以如果佢有咩事我會勁驚！現實啲講，萬一我早死過佢，男人有番咁上下年紀，再搵個o靚妹照顧你都得，但女人唔同，唔通搵個o靚仔咩？我又唔想。佢聽完就話：「如果我可以應承到你就好喇！」呢樣又真係冇人控制得到。
夫妻之道 切勿做常哦
夫妻相處是門重要學問，阿田與阿澤性格天南地北，兩人又怎樣協調相處？
無論拍拖定結婚，兩個人相處都係一個過程，畀你更加了解自己係咩人、點樣做得更加好。有時你覺得一段感情唔夠，係因為你唔肯放棄自己、檢討自己先去同對方相處。如果兩個人一齊，都唔肯放低自己去相處，永遠覺得「我係咁o架喇」、「你應該要點樣對我」，呢段關係唔會開心。所以誘惑又好、經歷過啲咩都好，都係一個畀大家成長嘅機會，學習去同對方相處嘅過程。呢段關係教咗我好多嘢，亦覺得對方為我放棄咗好多自我。我同阿澤係完全唔同嘅人，佢對所有嘢都要求好高，但我好多嘢都冇咩所謂，佢就咗我嘅係變得冇咁高要求，而我亦將自己嘅步伐加快少少就番佢。
彼此尊重
如果對方有咩問題或做錯嘢，我唔會話「你唔好咁啦」，就算佢對我都唔會咁講。我覺得要彼此尊重，每個人都有自己角度同生活方式，雖然一齊好似行緊相同嘅路，但其實大家都有自己嘅路去行，唔可以因為佢係我老公，就要框死佢嘅空間，咁樣對佢唔公平。你話佢行錯嗰步，但有邊個知佢一定係錯？都未去到結局，點解佢一定係錯呢？所以我成日會提住自己唔可以做「阿媽」，雖然男人永遠都長唔大，但佢已經有阿媽，無謂要佢娶多個阿媽，做一個畀佢照顧你、畀佢錫吓嘅女朋友咪仲開心！
後記：女強人也有脆弱時
幕前演活女強人的田蕊妮，在鏡頭前台型十足，甚有巨星風範！不過再堅強的人，提起家人亦會不禁流露出脆弱的一面，當阿田談及母親患病，平日硬淨的她亦淚盈於睫，更數度哽咽，足見她對家人的重視！
口述：田蕊妮
筆錄：張浩恩
攝：張福宏
場地：Marco Polo Hongkong Hotel
服裝：Miss Selfridge（i.t）
髮型：Ritz Lam@Hair Corner