洪卓立搭錯車札幌送機尾
歌手洪卓立（Ken）日前孖女友湯怡到日本北海道札幌滑雪，大懵的兩人原定昨午乘直航機返港，卻因早到火車站上錯逆方向的火車搞到「送機尾」，被迫滯留的兩人急急搵酒店及撲機位；而身在法國巴黎出席時裝騷的內地女星張馨予則遭扒手偷去銀包及證件，認真黑仔。
洪卓立與女友湯怡拍拖多年，感情穩定的兩人日前趁新年有幾天假，即飛日本札幌旅行兼滑雪，Ken昨日在社交網自爆因搭錯車搞到錯過航班：「本來是要坐飛機回港，我因為早了十分鐘到達火車站，現在上錯火車，向機場反方向去了很遠的地方，之後再原路折返到機場，飛機已經起飛了。」淡定的他續說：「隨機找酒店也是一種體驗，還有要重新買機票，也算是破財消災，好吧！」
湯怡嚇到面青
身在札幌的Ken昨午接受電話訪問時說：「已經搵咗間可以畀信用卡嘅酒店，依家搵緊機票，好彩呢兩日唔使做嘢同埋換多咗日圓。」記者笑指他要去買紙底褲更換，Ken笑說：「係呀，依家出去買。」
Ken更踢爆湯怡得悉航班已起飛嚇到面青：「佢聽到車長話一定趕唔到入機場，塊面青之餘仲成個跳起。」由於香港天氣較北海道暖，兩人原先穿單薄衣衫準備登機，Ken說：「本來除晒保暖衣，依家又要着番，仲拖住行李去搵酒店，兩個成個傻人咁。」
馨予變「野人」
另外，獲邀到法國巴黎睇時裝騷的張馨予昨晨在微博留言被偷去銀包，她寫道：「錢包被偷了，所有卡（信用卡）及證件都沒有了，我現在是一個身無分文的野人了，今晚別怪我黑着臉看秀。」到昨午，馨予放上自拍黑白照上網，相中見她一臉無奈，並寫道：「身無分文。」
文：音樂組