任達華 火辣長假 為愛女曬燶
名模琦琦與老公任達華及家人早前到澳洲及泰國過火辣新年。女兒任晴佳一向熱愛玩水，廿四孝爹哋任達華為捕捉女兒最珍貴的表情與動作，在烈日當空下曬足八小時，不單止變黑炭頭，連背脊亦被灼傷起水泡。
琦琦於今個農曆新年遠赴炎熱的澳洲及泰國度過，除有老公任達華（Simon）及囡囡任晴佳（Ella）外，還有其父母、好友，一行十餘人共度15日悠長假期。正所謂「貴人出門招風雨」，琦琦今次外出遊覽觀光點時，均遇上狂風暴雨，被身邊好友取笑今年一定好多水，賺到錢。
琦琦謂：「我哋去咗墨爾本睇企鵝，中午已抵『企鵝島』，先去睇朱古力廠，食咗好多美味嘅朱古力。跟住黃昏就去等企鵝上岸返屋企，點知突然狂風暴雨，但大家都堅持留低，所以搞到成身濕晒。睇到企鵝排住隊上岸，情景好得意。之後去動物園、主題樂園，又帶阿囡去同海豚近距離接觸。Simon為咗幫Ella影相，成個人落咗水濕晒，仲好失魂咁漏底咗個袋，好彩最後搵得番。」其後琦琦一行人坐飛機到黃金海岸卻遇上打風，險上不到機：「好彩遲咗個半鐘仲趕得切上機，如果唔係就去唔到，因為啲機票好爆。黃金海岸真係好靚，喺海灘玩咗好多水上活動。」
跳水公主停不了
琦琦一家其後轉飛泰國，繼續享受陽光與海灘，並於酒店泳池戲水。琦琦說：「Ella好鍾意水，佢同啲小朋友係泳池玩足8個鐘，不停跳水。Simon又全程跟到實影相，搞到大家曬黑晒。Simon個背脊仲灼傷咗，起咗好多水泡。Ella都好識做，自動話幫爹哋搽藥。佢今次好開心，全程黐實爹哋，難得老公有咁長假可以陪足佢咁多日。」被問到Ella愛跳水，會否想訓練她成為郭晶晶接班人，做「跳水公主」？琦琦笑言：「佢似Simon鍾意戶外運動，特別鍾意游水，但唔會要佢做專業運動員，做運動員太辛苦。」
文：名人組