杜德偉脫到未來

去年暑假舉行演唱會PartI大賣的杜德偉早前宣布再下一城舉行PartII，希望與更多人分享演唱會的精彩時刻，他說：「演唱會唔止係一個人嘅努力，台前幕後、製作人同伴舞等係一個團隊，好想將大家嘅努力同多啲人分享。」他指到時會有新的舞台，承接上次「我的虛擬星球」主題，將舞台設計成「未來世界」：「舞台會係一個虛擬嘅城市，利用視覺錯覺帶給大家有一個全新感受，亦會加多好多機關，同舞台互動，當中大部分都係冇喺紅館出現過。」

fans癲晒

上次開騷除淨「閃鑽三角底底」的Alex自言PartI每一部分都有喜歡的地方，但最最引起大家注意非「脫掉」莫屬：「因為呢個部分，係需要前面好多不同部分去帶動情緒，先可以將氣氛推向高潮，除咗我自己身體力行，台下觀眾都有一種精神上嘅脫掉，嗰一吓大家都癲晒。」

唔係舞男

Alex會否想大家齊齊脫掉衝向「癲」峰？他突然轉軚為其他部分抱不平說：「精彩部分何止脫掉，我哋唔好將個話題擺晒喺度，希望大家唔好太專注講脫掉，因為基本上我唔係舞男，只係我喺2004年出咗首歌叫《脫掉》，所以2004年後嘅演唱會都有呢個傳統啫。」

杜德偉正積極籌備Part II演唱會。

杜德偉在台上脫掉，帶動觀眾發晒癲。

文：音樂組

攝影：鄭家俊

場地： 紅磡都會海逸

Hair： ii salon @herman

Make up： Make up @hetty