甄子丹拍真人騷 爆老婆要求高
宇宙最強甄子丹昨日舉行公司新春團拜，一向是好老闆的他，更準備了178份禮物作大抽獎，寓意與員工「一齊發」；又透露接拍內地真人騷節目，笑言若與太太拍檔有壓力。而姨仔汪圓圓則表示早前與老公蔡加讚捏陶瓷慶生。
甄子丹和太太汪詩詩昨日在尖沙咀豪擺八席舉行新春團拜，出席的旗下藝人包括名模夫婦Jocelyn和Anthony及湛琪清，還有子丹姨仔汪圓圓偕夫婿蔡加讚，眾人均清一色穿紅衫。子丹在台上高興地說：「今日準備178份禮物，人人有份，希望同大家一齊發。」禮物中包括有iPad和iphone，認真大手筆，子丹說是為答謝員工多年來的支持和愛護。
唔畀仔女出鏡
提到今年的大計，他說：「今年最少拍三部戲，同埋會拍大陸一個電視節目，有少少武功，類似真人騷，（同太太一齊拍？）要睇太太時間，（你哋最有默契？）同佢拍嘢好大壓力，佢對我要求好高o架！（仔女一齊上鏡？）唔會喇！之前好多節目都想搵對仔女出鏡，畀我推咗，小朋友唔想咁高調，平時影到相OK，但唔會刻意拖佢哋出嚟。」他承認與太太最合拍，剛拍完一個床褥廣告，便變身肥版子丹，他揚言甚喜歡廣告中的肥版自己，笑言：「肥得幾有福氣，老婆都話現實嘅我如果有肚腩都OK，不過自己都係鍾意輕身啲。」
加讚驚喜牛一
另外，汪圓圓與蔡加讚婚後恩愛升級，她自爆月初為夫婿安排一個驚喜生日，她說：「佢中學時有學開整陶瓷，返嚟香港就冇時間，所以我喺佢生日嗰日book咗個陶瓷私人堂上，我哋一齊整陶瓷，（好似《人鬼情未了》咁浪漫？）個個都咁講o架，我哋係各自分開做，成手泥，唔係咁浪漫o架咋！」話雖如此，她說事前瞞住加讚安排，令他有驚喜，圓圓得戚地說：「如果我做男人，都幾浪漫o架！」她又透露女兒首年逗利是便超過一百封，會替女兒將利是儲起留用。
文：名人組