任達華被拖落水盼事件解決
對於外傳梁齊昕家人因導演劉俊輝曾開拍多套三級片，故不贊成齊昕與劉導合作，劉導昨於記招形容自己「受夠」，連珠炮發謂：「我同任達華合作過五套戲，佢套《雛妓》啱啱首映，都係三級片。梁小姐同黃秋生咁friend，秋生拍《人肉叉燒包》演姦屍、搵筷子插女人下體，演《伊波拉病毒》時攞塊生豬肉嚟洩慾，咁講法佢家人又唔叫梁齊昕同佢絕交？」劉導形容倘若傳聞屬實，有人有心撕裂本港影圈：「影圈應該百花齊放，我都拍咗好多其他題材嘅電影，咁係咪一定要拍文藝片先唔cheap？太偏見嘞！」
對於無辜被「拖落水」，任達華昨晚接受電話回應謂：「快啲解決件事啦，希望大家和平啲，呢個社會各人有言論自由，同樣地人哋唔想拍嘅話，都冇得逼佢拍嘅。」而黃秋生則拒絕回應相關言論。