李逸朗簽約未收錢
電影《男極探射燈》導演劉俊輝昨開記招指梁齊昕模棱兩可，令《男》片大受影響，自稱損失七位數。不過，據了解除了男主角李逸朗（Don）有簽約，其他演員包括彭懷安（Eddie）、樓南光、陳惠敏也未動筆簽約，眾演員也未有分文落袋。
Don經理人表示Don已經簽了約，現在正等電影公司開工，電影公司表示該片一定會開拍。Don則謂：「已經同電影公司簽咗約，但睇番銀行戶口，仲未收到錢，依家我都係等電影公司嗰邊安排開工，聽導演話齣電影一定會拍。（梁齊昕唔參演女主角的機會好高，如果合作唔成，會唔會好失望？）唔會，因為導演搵我做男主角時，我都未知邊位做女主角，（之前食火鍋後，可有再見齊昕？）冇再見過，因為我要拍戲，都好忙。」
早前有現身電影記招的Eddie對於導演與梁齊昕鬧出風波感意外，講到新戲似乎開拍凍過水，他說：「冇辦法，開得成當然開心，開唔成都冇問題，自己未簽約亦都未收訂金。之前朋友搵我，公司又話冇問題咪出席記招，做人唔好怕蝕底，希望套戲開得成。」
未簽約的樓南光指不清楚電影能否開拍，與片方也沒聯絡，據他所知其他演員亦未簽合約，至於可知梁齊昕有否合約？他說：「片方話簽咗，實際有冇就唔知。」演梁齊昕爸爸的陳惠敏只願回應與電影公司沒簽約，其他問題拒回答。