城城睇桃花谷旺人緣

天王郭富城昨日到海港城出席賀歲活動，身為愛車之人的城城霸氣騎着電單車登場，更為金龍醒獅點睛，祝賀香港新一年三羊啟泰、風生水起。城城笑言今年新年終於可以回港過節，一家人團團圓圓食團年飯：「媽咪整咗好多餸，人哋煮燕窩係四分一碗，我媽咪煮係成碗都燕窩，好似食飯咁，我特登打咗包返屋企。」

戴口罩行年宵

城城又自爆「易容」去維圍行年宵，更不斷發現「新大陸」：「我同練馬師傾開，發現原來佢冇行過年宵，所以年三十過咗十二點就一齊去行吓，當然我有戴口罩啦！好多新嘢，我仲見到有支噴霧（防水用品），噴咗會有層保護膜跣水，好方便。（有好耐喇！）係咩？咁我大鄉里喎！」問到可有到花檔「惹桃花」？他謂：「桃花代表人緣，希望來年電影同音樂都會有更多人喜歡。」

城城用力敲響鑼鼓，神情興奮。

城城騎電單車霸氣出場，祝香港繼續車水馬龍。

擺同事上枱

提到城城在台上喪撩小朋友玩，會否想在新一年為郭家添丁？他即推搪謂：「隨緣，今年都會以電影為主，四月會有中國同馬來西亞嘅巡演。（媽媽有冇催婚？）媽咪唔講呢啲，等上天安排。我都會想成家立室，但我之前扭親腳，媽咪仲係好擔心我叫我小心啲。」記者笑他身邊若有女朋友照顧就不用媽媽操心，城城即擺同事上枱，笑言公司同事對他無微不至。

文：音樂組