小發哥糕興過年

發哥今年以行山度新春，過得輕鬆寫意，多番被Fans在山頭「捕獲」合照！回想起兒時在南丫島的農曆新年，發哥表示會放炮仗及幫家人炮製大量糕點派街坊，相當熱鬧：「啲年糕成個大鑊咁蒸，仲有角仔、紅豆糕、蘿蔔糕，成幾十斤，當時冇咩好食，呢啲食到五月初五o架喇！以前生活環境貧窮，冇依家咁大魚大肉，過年先捨得劏一隻豬，平時連雞都少食，多數係白飯同菜，所以新年食得零舍開心！」