發哥欽點青雲趙薇擸獎
神級影帝周潤發對香港影視圈向來相當留意，提到本屆香港電影金像獎提名，他力推劉青雲及趙薇封帝稱后，又大讚「新人王」後輩王菀之！發哥又大談最近合作的張家輝及劉嘉玲，盛讚家輝是戲精，嘉玲則舉手投足都非常迷人！
從未Out過的神級影帝周潤發早前宣傳電影《賭城風雲II》，接受《東網》訪問大談對現今影圈的看法，提到本屆香港電影金像獎提名，向來是「Tips神」的發哥講出心水！
王菀之可造之材
對於影帝之爭，發哥睇好同屬無綫出身、其後在影壇發光發熱的劉青雲，並對他讚不絕口：「影帝係青雲啦！鍾意佢！（覺得佢得過一次影帝太少？）佢超班！應該再拎！」影后方面，發哥認為吳君如、趙薇、湯唯、周迅及蔡卓妍（阿Sa）均演技出色，相當難揀，他一度有提起後起之秀阿Sa，但最後仍憑感覺認為應由趙薇贏獎：「女仔好難揀喎！聽講阿Sa演得幾好，好豁出去喎！不過我估趙薇，感覺係！」
至於王菀之破紀錄共獲五項提名，發哥認為她是可造之材：「希望佢女配角、新人、歌曲獎拎晒啦！我有睇過佢電視劇嘅演出，平時佢個人唔係咁，但做得到同自己好唔同嘅角色，幾得意！」
張家輝演技成精
發哥在《賭II》中與影帝張家輝及影后劉嘉玲合作「鬥戲」，兩王一后張力十足，發哥提起這兩位拍檔即眉飛色舞，先大讚家輝演技爐火純青：「佢由電視台捱到拍電影，已經成精啦！七帝張喎！佢大把本錢，演咩都得，正邪搞笑咩都得！」戲中有幕戲家輝Gel行頭扮賭神高進，狂打「刀仔」發哥的頭，鮮有做下把的發哥大呼好玩：「佢演我師傅吖嘛！打頭呢幾吓係我度嘅，冇咩人夠膽做，喺我面前做我喎！咁先好玩！」
至於與嘉玲闊別廿多年再合作，發哥讚她舉手投足都充滿韻味：「80年代電視台合作嗰陣，佢仲係少女，依家係女神，每個動作都賞心悅目。（比廿幾年前更吸引？）梗係！依家係佢最Charm嘅時間，靚到不得了！」
文：陳偉立
攝：秦健輝