徐濠縈東京全馬 仆住創佳績

馬拉松好手徐濠縈,年初四身在東京參加馬拉松比賽,雖然比賽期間不慎仆倒兼抽筋,但無阻「肯雅徐」之名,她刷新了個人42公里全馬的最佳成績,雖然仆損膝蓋,但有老公陳奕迅、女兒呵護,阿徐一定甜入心。

熱愛跑馬拉松的徐濠縈,昨日跟林海峰(Jan)一同在日本東京參加全長約42公里的全馬比賽,她最後以三小時四十五分鐘完成賽事,刷新個人最佳時間;阿Jan的時間則是三小時四十九分,不過阿徐臨近終點時卻不慎跌倒兼抽筋,否則可以跑出更佳成績,阿徐在instagram上載右膝蓋受損照片,留言:「今天我做了兩個紀錄,就是PK同PB(Personal Best,個人最佳紀錄),戰績彪炳。」

老公囡囡終點打氣

阿徐透過短訊回覆:「跑到去40公里左右,因為kick到塊計時地氈,跌倒損咗好痛,仲要抽筋,(但都破到自己最佳時間!)唔係最fit,始終體力未夠好,如果體能夠好,我諗唔會咁易抽筋,我成日PK(跌倒)。」阿徐形容東京天氣好凍,等候開跑時要穿雨褸保暖,她說:「我都喺比賽時跌低過,平時耐唔耐都會跌,但都要繼續前進,不過因為抽筋可能跑慢咗。」之前阿徐曾透露老公陳奕迅及女兒康堤會在終點等她,她說:「阿臣(Eason)幫我買晒嘢,都要返到酒店先可以清洗傷口同包紮。」

今次東京馬拉松開跑前受恐襲陰霾影響,現場明顯加強保安,阿徐說:「日本係比較嚴謹,有好多範圍除咗跑手,普通人係唔可以入去,似機場check行李,啲袋全部要check,我都知道有警衞陪跑。」完成馬拉松賽事後,阿徐將偕同老公Eason、女兒放假暢遊,今年四月她會在港再參加10公里比賽。

AGA受激勵四月參賽

環球歌手AGA雖然沒有參加今次東京馬拉松,但大年初一跟阿徐一齊到日本集訓練習,她說:「好開心又緊張,去到東京第一日就同一班備戰馬拉松跑手一齊喺條街跑,我第一次喺條街跑,係一個好好經歷,好難忘,當然我冇阿徐跑得咁犀利,但佢哋教咗我哋好多跑姿及常識,推高咗我呢團跑馬拉松嘅火,依家返港會積極練習,為四月馬拉松備戰。」

文:音樂組