發哥票房3億羊威 全靠好老婆
【陳偉立、秦健輝成都直擊】踏入羊年，肖羊的神級影帝周潤發更當旺，主演賀歲片《賭城風雲II》大受歡迎，香港及內地暫時共狂收逾三億港元，旺足40年的發哥分享成功妙法，最緊要是樂天知命、努力求進及「錫老婆會發達」！提到與發嫂結婚近30年仍糖黐豆，發哥發揮風趣本色，自認BB要人照顧，若沒有對方在身邊，隨時三日不沖涼充滿「男人味」！
堪稱「逆齡男神」的影帝周潤發生肖屬羊，今年踏入60歲依然精力充沛、瀟灑有型！日前發哥在四川成都接受《東網》記者專訪，關心民情的他祝願全港市民日日開心，樓價降低人人有屋住，以及社會氣氛更和諧！
「羊佬」發哥大談羊年願望，熱愛行山的他笑言想盡快行畢全港所有行山徑，問到是否想愈來愈青春？他笑說：「唔會啦！人唔可以違反地心吸力，除非個人倒轉行，所有嘢咪倒轉囉！（覺得60歲係新階段？）都係，六十古來稀吖嘛！哈哈！60歲係值得懷念嘅年份，最想快啲拎到長者兩蚊優惠，我成日坐公共汽車，方便好多o架！」
反應佳望收八億
問到近年新春有何節目？愛靜的發哥表示多數留家待好友前來拜年，並會睇書、上網及整理相片，最多只會外出行山做「山寨王」，實行輕輕鬆鬆度過：「好少出埠，唔想舟車勞頓，留港就多數行山囉！冇人過年行山嘛！全個山頭都係我，做咗山寨王！（布置屋企？）買盆花囉！桔都好少買，食嘢都係簡單，最緊要食菜食魚，賀年食品好似油角、煎堆就食少少啦！」發哥又透露羊年繼續密密拍戲，包括接拍導演陳木勝新作，各位發迷密切留意喇！
旺足四十年的發哥長期企穩一線男星寶座，今年主演的賀歲片《賭城風雲II》更大收旺場，暫時上映四日內地收逾2.4億元人民幣（約2.98億港元），香港截至前日則有1,152萬港元，發哥昨日回應說：「我同晶哥（導演王晶）通過電話，佢最開心啦！我都開心，舊年四日都未過億，今年快咗好多，一開畫就六千幾萬啦！多咗成倍！（破舊年五億幾紀錄？）睇形勢應該會，晶哥又唔係好貪，想收八億，希望係啦！」
獨愛發嫂拿手菜
對於長旺秘訣，發哥體現「愛老婆會發達」的金石良言，雖然不停搞Gag，仍感受到發哥發嫂之間的深情，發哥說：「冇佢喺我身邊就死得喇，咩都唔想做喇！我仲係BB嚟，唔帶佢出嚟邊個照顧我？我衫又唔買，妝又唔化，污污糟糟咁，有人指住我令我檢點啲好啲嘅，如果唔係我幾日都唔沖涼，冤崩爛臭，正一臭男人嚟o架喇！（鍾意發嫂啲咩？）簡單、好純又聰明勤力，佢鍾意鑽研好味菜式，有啲味道係佢先煮到！」發哥自爆兩人仍不忘慶祝生日及結婚周年，笑言會送花及魚蛋河：「生日就送多兩粒魚蛋同片頭，有圓有三角好過癮！哈哈！（點慶祝下年結婚30周年？）整兩粒湯圓佢歎囉！」
此外，發哥認為成功在於生活簡單少負擔，不追求名利及新科技，還有是不斷求進，即使貴為影帝仍謙虛學新事物：「想進步就唔好自滿，事實上自己有好多嘢唔識，就算睇劇本都會遇到唔識嘅中文字，讀書讀得少吖嘛！唔識就要問人！」