Eddie花心思朱慧敏肯嫁

現年35歲前EO2成員Eddie（彭懷安）昨日在社交網站晒出比他少2歲的女友朱慧敏（Queenie）穿上情侶裝的甜蜜合照，並留言：「從此以後，無論墳前或人前，由你說願意開始，我將會用盡一生去愛你，保護你，直到老死，朱，我愛你」正式宣布向女友求婚成功，本報致電朱慧敏恭喜她，但至截稿前，其電話一直冇人聽。

2016年行禮

Eddie昨回覆本報暢談求婚絕招，他說：「Queenie冇覆係因為唔舒服，瞓咗覺休息，可能尋日（即前日）行咗5粒鐘花市！之前我喺未來外母墳前，得一紮花就求婚，Queenie話我：『花都冇！』咁我尋日咪同佢由黃昏6點開始行花市，行咗5粒鐘！（佢肯行咁耐？）佢鍾意節日氣氛嘛，我咪盡男友責任陪佢又去維園又花墟，連團年飯都冇返屋企食，不過冇所謂，飽晒！返到屋企我就拎咗佢最愛嘅白色百合花正式求婚，今次佢應承咗！」

Eddie與朱慧敏穿上情侶裝及晒鑽戒宣布婚訊，但否認女方懷孕。	鑽戒。	朱慧敏不時在她與Eddie等人合資的餐廳幫手。（資料圖片）

Eddie吸取「墳前沒有花」的失敗經驗，出動白百合花加鑽戒終於求婚成功，他更與女友着同款tee影溫馨合照公告天下！但他否認未來老婆有B：「絕對唔係，肯定唔係！我哋婚期定喺2016年，點會咁快（有Ｂ）？依家嘅未來大計係積極搵錢，籌備2016年嘅婚禮！」

愛得簡單

此外，Queenie早前接受本報訪問，大談愛情觀：「拍拖我希望結婚，我好信任（男友），大家都做呢行，佢都影響我好深，我哋嘅相處冇戲劇性嘅浪漫，但有簡單嘅陪伴。」其實Queenie早前孖Eddie於西環開餐廳，身為藝人的她仍不嫌辛苦朝六做到晚十二，賣包、迎賓一腳踢，可謂洗盡鉛華，非君不嫁的態度令她覓得有情郎！　

攝：秦健輝

場地：華星客棧

文：影視組

採：專案組