官恩娜霸道人妻老公冇碇企
華納「一哥、一姐」周柏豪（Pakho）及官恩娜（Ella）在過去的馬年各自大豐收，Ella榮升幸福人妻，羊年將會趕築新房與老公過二人世界。至於去年樂壇成績突飛猛進的柏豪則有意效法Ella成家立室，雖然羊年宜嫁娶，兼早已認定女友Stephanie為新娘人選，但他決定一切婚事Hold住先，反而在工作上繼續衝刺賺老婆本！
周柏豪與官恩娜率領華納一眾師弟妹連詩雅、Dear Jane、AOA及陳詠謙向《東方日報》讀者拜年，「一姐」Ella在過去一年成功趕及尾班車做「馬年新娘」，與混血醫生老公拉埋天窗，本以為她在羊年是首度開齋派雙封利是，怎料大頭蝦的她原來一直派錯利是：「我未嫁嘅時候都已經派咗兩封，我以為兩封係禮貌嚟，好事成雙。所以我慣咗派兩封啦，今年所以冇乜壓力，不過可能意義唔同咗囉。」
搵樓多嘢搞未揀新房
雖然老公是混血兒，但Ella透露新年將會帶他入鄉隨俗上門拜年，而這對新婚夫婦羊年最大願望是趕築新房，不過Ella「河東獅」上身說：「依家仲未搵到地方，如果要一齊住，共用空間呢個問題要諗，因為我個人好霸道，可能只畀佢用一個櫃桶，其他地方都係我嘅。發現搵樓真係幾多嘢搞，要搵地方，又要裝修。」
Pakho認定Stephanie
同樣是愛情事業兩得意的柏豪放風表示想效法Ella成家立室，更發表愛的宣言稱已認定Stephanie是結婚人選：「畢竟一齊咗唔係一段短時間，大家有默契啦，我一定會plan呢樣嘢，我都係一個傳統嘅人，想有個美滿屋企，希望父母開心。」
揀定了新娘子，加上肖鼠的柏豪在羊年宜嫁娶，天時、地利、人和配合下，柏豪卻冇意做「羊新郎」，反而想將精神放在如火如荼的演藝事業上：「啱啱先係事業開始，唔係話舊年成績表好，就可以放慢腳步，依家先係上到架車開車咋，想放多啲時間做嘢先。」
鳴謝：葉偉賢洪拳葉館
場地：紅磡都會海逸酒店
服飾：XPX、Sportmax Code、Ted Baker
髮型：Cliff、Kelvin Koo、Lorraine、Zap Tang
化妝：Jonathan、Onki、Kris Wong、German
文：音樂組