杏兒遭踢爆趕做羊年新娘

胡杏兒去年底成功「破Dry」，與從事金融的Philip Lee（Phil）撻着，兩人戀火愈燒愈旺。早前兩人被《好報》拍得幸福遊街兼同居試愛，她又經常對Phil有讚冇彈，幸福之情收都收唔埋！

唱情歌樣勁冧

前晚杏兒與好友胡定欣、張繼聰、黃美棋及林欣彤等到荃灣出席農曆新年倒數活動，身穿白色連身裙的杏兒大晒美腿，人逢喜事精神爽明艷照人。提起男友不單止沒有避忌，反而甜蜜滿瀉，並繼續發放強勁「幸福閃光彈」！大會安排眾星在台上寫揮春，杏兒玩食字寫上「杏福快樂」，並拿起揮春甜笑。談及新年願望時，定欣望着杏兒催婚笑說：「希望今年身邊會有喜事發生啦！」杏兒報以笑容，並箍着定欣笑說：「你先啦！」定欣再說：「我唔會追過你嘅！」似暗示好友好事近。

杏兒與Phil公開戀情後，早前大方翹住出巡。

杏兒被追問戀情時，經常甜笑摸頭。

其後杏兒獻唱國語歌《我的歌聲裡》，唱到「你存在，我深深的腦海裡，我的夢裡，我的心裡，我的歌聲裡」幾句歌詞時一副冧樣，擺明向男友隔空示愛，心情大靚的她又落台跟觀眾握手，全場High爆！

杏兒受訪時被問到為何寫下「杏福快樂」？她繼續晒命說：「係大會叫我寫，但我都覺得係（幸福）嘅！依家開心呀！希望新一年樣樣都順利啦！（感情呢？）好開心！再開心就應該冇得再開心喇！（Ready結婚？）嘩！太快喇！都要拍吓拖先。（媽咪催婚？）有少少啦！不過要再相處吓先，都有見過雙方家長。」她又透露準備到男友家中拜年，並會送美食孝敬未來奶奶：「小心意，係食得嘅嘢。」問到今年過年是否比去年開心？她笑說：「唔記得上年係點，都開心嘅。如果喺外地過年就寂寞啲，所以都盡量想留港。（下年同男友派利是？）未諗呀！咁我工作都會派，如果係（結婚）到時你哋一定會知o架啦！」

想拍拖行花市

杏兒不介意帶Phil外出拍拖，但指Phil尚未習慣被追訪，並踢爆男友問她為何沒有刊登自己笑的照片，杏兒說：「我話佢唔記得笑囉！可能佢未慣，仲係會嚇親。（帶佢出多啲街？）要平衡吓。」問到活動後會否跟男友行花市？她搞笑說：「會唔會太激動？不過都想嘅！」

文：影視組