田蕊妮冇記性利是派不停
今日大年初一，身為人妻的田蕊妮繼續派對是派到手軟，自言冇記性的她經常派完又再問人有冇收過，慶幸逗利是的人收完一封就算，令她未至於變成「利是影印機」！阿田又講明羊年會與老公杜汶澤帶愛貓Momo齊齊拜年，更首次將Momo印在利是封上，與親友分享「一家三口」的喜悅。
很多人以為派利是對於已為人妻十年的阿田是駕輕就熟的事，但她笑稱向來冇乜記性，總不記得派給誰：「我年年派利是都冇乜記性，派完又再問人有冇派過，幸好大部分人收完我利是都會同我講番，哈哈！」
Momo肖像利是封
阿田稱自前年飼養愛貓Momo後，已榮升「人母」級，向來重視農曆新年的她笑言曾訓練「愛女」Momo向親友拜年，惟最終無功而回。她說：「我特訓咗Momo兩年，希望佢同人拜年，但佢都係唔識講『恭喜發財』同『請請』，老公咪話其實佢只係一隻貓，唔會識做呢啲。」但她為令大家過年開開心心，羊年將Momo印上利是封派街坊：「我有個fans畫畫好叻，今年佢送咗個有新年氣氛嘅畫畀我，上面畫咗我、老公同Momo。我好鍾意幅畫，因為有埋Momo，所以攞咗去印利是封。」
阿澤包辦團年飯
阿田以往新年定必包辦煮團年飯，惟現已被「瘋廚」老公阿澤取代：「因為老公研究廚藝已經進入咗瘋狂地步，所以佢唔再畀任何人煮。但佢真係咩都煮到！只要你話想食咩，佢就會去諗點煮。」但其實在芸芸的新年準備工夫之中，阿田最愛布置全盒：「我細個去拜年，第一件事唔係逗利是，係食全盒！因為細個去親阿嫲屋企，個全盒都係我鍾意食嘅嘢。依家因為係我負責全盒，所以可以買番細個鍾意食嘅糖，重溫一下童年回憶。」
文：專案組
攝：張福宏
場地：Marco Polo Hongkong Hotel
服裝：Miss Selfridge (i.t)
髮型：Ritz Lam@Hair Corner