祖藍娶妻喊足3日
剛剛完成婚事的王祖藍與李亞男，昨日以夫妻檔出席宣傳活動，祖藍坦言婚禮令他開心到喊個不停，甚至昨日為活動化妝時仍按捺不住落淚，笑言足足哭出一公升眼淚。
藝人王祖藍、李亞男剛完成婚事，昨日結伴席無綫節目《蜜月到訪》的宣傳活動，二人雖看來精神奕奕，但亞男活動期間仍叫祖藍做「祖藍」，祖藍忍不住糾正她說：「咩呀！老公呀！」祖藍透露由大前日的婚禮起令他開心到喊個不停，足足流咗「一公升眼淚」。
曾志偉似阿爸
祖藍說：「我喊到今日化妝都仲流緊眼淚，最令我感動嘅係曾志偉，同我個餅印阿妹。呢行好多人叫志偉阿爸，但我係從來冇嗌過，因為阿爸呢兩個字我唔係咁易嗌得出口，但係我多謝番獎門人台慶當晚邀外父、外母同媽咪出嚟，我嗰一日覺得佢真係似阿爸，佢都即刻真情流露。」
亞男表示感激老公送首《青蛙王子》歌給她，並說：「好感動，佢咁唔得閒都有時間作首歌送畀我。」她又指今日會返上海與家人食飯後再去度蜜月。問到有否打算生小朋友？亞男說：「多啲習慣二人世界先，突然之間有三個人喺度，可能唔係咁適應。」
郭偉亮摑老婆
同場，音樂人郭偉亮（Eric）與太太葉佩雯在活動上被播出精華片段，片中Eric說曾經摑過葉佩雯，他解釋說：「初認識時，佩雯情緒好唔穩定，成日鬧交、掟嘢，好鬼失控。」他們又表示被「藍男」婚禮感動落淚，葉佩雯說：「我好後悔冇帶嘢補妝，之後仲要做電視訪問，成個豬頭咁！」她憶述當日老公在紅館求婚一幕，感覺到Eric接吻時伸脷都被嚇親。
另外，祖藍發放了他接新娘、婚禮和婚宴的照片，結婚照片中王祖藍扮凌空懸浮，顯出童話式的婚禮感覺。
文：影視組