泳兒及時開聲激發風情
靚聲歌手泳兒前晚舉行音樂會，其中一part她化身葉玉卿大跳《擋不住的風情》，性感演出令人驚喜，之後她又自爆開騷前的失聲驚魂，期間更一度落淚。受訪時，她透露失聲期間差點有情緒病，慶幸得到男友Ziv的體貼照料。
泳兒（Vincy）前晚情人節假演藝學院舉行《愛、情歌 泳兒音樂會》，一頭金色加粉紅色頭髮登場即大唱多首自己的飲歌，又分別與嘉賓洪杰和側田合唱，並宣布將會推出Hifi碟《愛情歌2》。接着她換上裸色的連身短裙和高跟鞋跳葉玉卿的《擋不住的風情》，不時趷籮自摸，非常誘人！之後更與一名男dancer大跳貼身舞，被對方摸腰和打pat。
去到尾聲，Vincy提到入行第十個年頭，這次音樂會的壓力是十年來最大，之後她忍不住落淚，並自爆上月曾經失聲：「呢個係上天畀我十年嘅考驗，我好唔開心，覺得好唔抵，因為我又唔係唱得太多，我把聲喺上個禮拜都未上到高音！」她又謂沒想過能夠順利完成演出，所以非常高興：「今晚雖然我把聲唔係十年最靚，但係我將最好嘅畀晒大家！」
感激男友呵護
接受訪問時，Vincy透露在一月中時聲線愈來愈沙，當時覺得很害怕：「我有去搵啲神醫同去睇醫生，但都冇好轉，早幾日有朋友介紹我去睇女中醫，把聲先開番少少！」問到男友在她失聲期間如何給予支持？Vincy說：「我會突然間喊，差啲有情緒病，因為失咗把聲好down，我喊佢會安慰我，有時我都有啲小脾氣嘅。」她又透露情人節收到羽絨褸做禮物：「我好like！因為佢知我病得好緊要，需要呢啲去防備！」
文：音樂組