Fiona保持聯絡恨見祖名
房祖名去年因容留他人吸毒罪在北京被拘留，至13日凌晨獲釋後，其緋聞舊愛薛凱琪（Fiona）連續兩日都有跟祖名保持聯絡，昨日Fiona接受電話訪問時，直認有電聯對方，由於要尊重他，故不透露祖名身在何方及其心情，她說：「作為佢好好嘅朋友，佢依家最需要時間陪屋企人，（會約佢見面？）我梗係想，不過我要排隊喎，唔係話想見就要立即見。」
談及祖名欲退居幕後，她大讚好友才華洋溢，她謂：「我叫佢作歌畀我，但佢話好有壓力，因為佢話要畀最好嘅作品我，所以佢嘅承諾未兌現到，不過好嘢就要等啦。」又指祖名夠資格做幕後外，更有本錢再做幕前，皆因他的歌能感動人心，她不諱言：「記得一年前，佢畀過佢自己啲歌嘅demo我聽，真係好好聽，但因為我係獅子座好要面子，所以忍住唔喊，（點解唔問佢要咗呢啲歌？）因為啲歌好講佢嘅心情，係佢嘅，唔方便要。」
另外，黃秋生雖因事忙而未有全程緊貼收看房祖名記者會，但他仍力撐對方：「祖名份人不嬲誠懇，經過此事，佢一定會展開新人生，會更加積極。（你支持佢全力復出？）幕前未知係點，因為仲要視乎市場，但就算佢去讀書、進修，我都好相信佢會有一個好成功嘅人生，我fully support佢！」