古仔 阿佘濕啜唔過電
古天樂與佘詩曼首次合作即「鴛鴦戲水」兼自製浪漫，鏡頭前二人sweet爆卻原來有苦自己知。雖然躋身螢幕情侶之列，古仔卻毫不擔心與阿佘傳緋聞。至於新片情人節「高開」，教台前幕後高興不已，張智霖更期待古仔表演食榴槤慶功！
由古天樂、佘詩曼及張智霖（Chilam）等主演的賀歲片《衝上雲霄》電影版於情人節率先舉行優先場，香港票房單日錄得186萬，馬來西亞方面因場場full house關係要臨時加場，成績教台前幕後振奮不已。昨日Chilam與阿佘到訪馬來西亞宣傳，即席主持「撈起」儀式，預祝票房愈撈愈起！鬼馬的Chilam笑言要帶一個「貓山王」返港送給最怕食榴槤的古仔，更着對方於慶功宴上「表演」食榴槤。
戲中扮演航空公司CEO的古仔，與空姐阿佘上演一幕「翻撻情緣」，導演更安排二人「鴛鴦戲水」，席間古仔的42吋胸肌盡現人前，相當吸睛！而談到這場重頭戲碼，二人卻有苦自己知，古仔笑謂：「好凍，仲要喺水池底打燈，好驚觸電囉，嗰日喺間屋內走嚟走去咁拍，又有強吻戲，都算劇烈運動。（傳緋聞？）我淨係拍電影，阿佘就電影電視一齊嚟，都好少機會碰面，應該唔會嘞。」
靚靚向男神獻吻
為營造浪漫感覺，古仔更自度「冧女好橋」，加插一場「幸福摩天輪」的戲。他表示：「兩個人相處要啲小情小趣。（有冇諗過第二日點求婚？）好佩服依家啲人嘅求婚創意，不過我未必會咁做，起碼唔會喺幾十人面前跳舞先啦。」在旁的阿佘聞言即謂：「有人求婚都好浪漫嘞。」古仔衝口而出：「年紀大有人求婚就好好。」記者笑指他嫌阿佘老，他急忙補鑊：「佢都仲好後生。」
另外，Chilam與袁詠儀（靚靚）演出內地綜藝節目《一路上有你》，前晚終輪到萬人迷李敏鎬擔任特別嘉賓。這位「長腿oppa」向靚靚送上熱情擁抱，氹得靚靚直呼「很喜歡你」及作勢獻吻。她又叫李敏鎬喚自己姐姐，又直指很期待與對方合作。
古天樂
髮型：Dan Tam@Pi4
化妝：Carman Man
佘詩曼
服飾：Tsumori Chisato
造型：Tungus Chan@Formz
髮型：Lorraine Lam@Hair Culture
化妝：Katherine Lo
文：影視組