李亞男洞房甩轆 祖藍喜宴散精力
王祖藍與李亞男前日註冊結婚，昨晚移師迪士尼舉行童話式主題婚宴，被問到身為基督徒需否學習如何行房？祖藍驚爆尚未成事！撞正月事來臨的亞男則嬌羞謂：「唔方便講，因為真係『唔方便』！」祖藍則笑言：「留番精力擺酒用。」而專誠來飲喜酒的曾志偉，則透露已向祖藍提供動作指導。
「藍男」婚宴昨晚於香港迪士尼樂園酒店筵開51席宴請親朋，傍晚在兄弟與姊妹團陪同下見傳媒，一對主角以王子、公主Look亮相，兩人非常入戲在高台位置向下方半百傳媒揮手，頭戴皇冠、身穿喱士加少許低V大露背裙的亞男大送飛吻，十足王子、公主出巡見子民！不過兩人並未咀嘴，似聽不到傳媒訴求！之後兩人在米奇及米妮陪同下切蛋糕，並收下證書、「藍男」城堡前留影的婚紗照等紀念品。
「藍男」過完王子、公主癮後受訪，亞男表示新婚夜過後筋疲力竭：「好攰呀！尋日食完情人餐，即刻返屋企瞓！（嘥咗個洞房花燭夜？）唔方便講，因為真係『唔方便』！」祖藍說：「唔緊要啦，留番精力擺酒用，但佢今晚都依然唔方便，留蜜月啦！」追問「藍男」身為基督徒需否學習行房？祖藍說：「呢樣唔方便講！I am ready. She is not！」亞男搞笑謂：「要搵心理輔導囉！」
蜜月歐遊三周
祖藍指婚宴後會到上海探親戚，再歐遊3星期共4個國家：「我使咗唔少啦！做公主係要講浪漫氣氛，佢話點就點！」他又否認被指藉結婚倒賺二百萬：「我使嘅都唔止呢個數，使咗幾球（百萬）呀！賺唔番，蜜月後我工作排到密晒！」「藍男」晚上換過另一set王子、公主裝，在司儀林盛斌及陳嘉佳（小寶）介紹下步進婚宴會場，亞男bra top短裙，勁谷3吋事業線，祖藍則戴上超巨型皇冠，在視覺上拉近與老婆身高上的距離，祖藍說：「搞婚禮好大壓力，有咩得罪我唔理，因為我哋係主角！」他又在台上祈禱感謝婚禮籌備過程順利，又與亞男合巹交杯玩錫錫，又安排姊妹圍圈傳花球，朱璇與苟芸慧齊將花球塞給宋熙年，希望她早日出嫁，但最終被小寶夾硬搶走。祖藍在晚宴上唱出花一小時作詞的《青蛙王子》冧老婆。
志偉開咪催生
曾志偉席間趁機塞紙碎入祖藍口，開心過娶新抱，他說：「飲完要飛美加工作，唔想被抬上機咁核突！（點玩新人？）準備咗遊戲，唔係不文，佢哋基督徒嚟！（教佢哋洞房？亞男話呢幾日唔方便？）唔方便咪聽日囉，我醒幾餅AV畀祖藍！（譚詠麟嗰招倒掛金鈎？）啲老鬼嘢，廢廢地！功夫呢家嘢好個人嘅，佢哋初級咋，童男童女，慢慢嚟！（亞男話要搵心理輔導？）梗要輔導！」他在台上寄語新人：「好自為之，好好造人！」其實前晚「藍男」共度婚後首個情人節時，祖藍對造人大計已說：「好攰，返屋企瞓覺，聽日（即昨日）先算！」難怪志偉不厭其煩，開咪催促！
文：影視組