發哥男神「登6」：留畀後生仔
【陳偉立、秦健輝北京直擊】神級影帝周潤發在演藝圈屹立不倒40年，多年來經典角色無數，去年發哥強勢回歸華語影壇，賀歲檔同時有兩部電影上映共收逾15億元人民幣，再創高峰！現年59歲的發哥更是愈來愈有型，瀟灑倜儻，被網友封為「長青男神」！發哥早前接受《東網》獨家專訪，剖白紅足40年的感受及分享不老秘方，他笑言快將「登6」，不會再跟後生爭男神之位，最重要活得自在！
國際巨星周潤發於1973年18歲時參加無綫電視第三期藝員訓練班入行，當紅逾40年，曾3奪香港電影金像獎影帝，至現在仍坐穩一線男星寶座，早前發哥在北京接受《東網》獨家專訪，分享「防腐」秘訣！
謙虛講成就
年屆59歲的發哥保養得宜魅力爆燈，加上為人親切富幽默感，fans層面橫跨老中青三代，難怪被網友封為「長青男神」！對於此封號，發哥開心地說了3次「誇獎」，他謙虛地說：「我都就嚟『登6』（60歲）喇！仲有幾多年呀？學黎耀祥話齋，仲有幾多個10年吖！哈哈哈！每個人都有風華絕代嘅時候，但我已經過晒喇！唔追求呢樣嘢，男神嗰啲留畀後生仔做啦！」問到發哥有何「不老秘訣」？他表示要早睡、少吃及多運動，最重要是淡泊名利，長期處於開朗狀態：「我冇咩牽掛，冇細路，唔諗咁多嘢，自己冇擁有咁多嘢，個人就簡單，我車都唔要，自己行路，坐公車，生活平淡，冇咁多欲望，冇咩包袱，個人輕鬆，行步路都快啲！」
百歲要抖抖
發哥多年來經典作品無數，包括劇集《網中人》、《親情》及《上海灘》，電影《英雄本色》、《監獄風雲》、《秋天的童話》、《賭神》、《阿郎的故事》、《臥虎藏龍》、《滿城盡帶黃金甲》到近年的兩集《賭城風雲》等，更曾到荷里活拍過多套賣座外語片，紅遍內地、東南亞及海外，回想多年來的經歷，他說：「有幸人哋搵親你都係比較孭飛重啲o架囉！你話紅足40年，係咁啱天時地利人和，80年代之後電影低潮，我有機會去外國拍戲，到大陸市場開放，又有機會返嚟，係一命二運三風水，全靠製作人、導演、編劇諗到角色適合周潤發做，否則點可能成日有角色畀人懷念？好大因素係佢哋，我淨係讀對白就得！」
發哥認為要成功，演技及運氣當然重要，但更需要勤力、準時、高EQ及人際關係！問到是否有信心再紅四十年？他笑說：「到時『一舊』（100歲）o架喇喎！『一舊』唔好做啦，我想做多5年就唔做！哈哈！」
（全文完）